Alǵashqy basqosýda Avstrııa delegasııasynyń basshysy, Ǵylymı zertteýler jáne ekonomıka vıse-mınıstri Bernadette Gırlınger sóz sóılep, Qazaqstan ózderiniń Ortalyq Azııadaǵy mańyzdy seriktesi ekenin áńgimeledi. «Kúlli dúnıe kóz tikken kórme aıasynda Qazaq eliniń astanasy «Bolashaqtyń energııasy» taqyryby boıynsha jańa ıdeıalarmen jáne sheshimdermen almasý úshin eń qolaıly alańǵa aınaldy. EKSPO – aqparattandyrý, shabyttandyrý jáne qarym-qatynas jasaý úshin taptyrmas oryn», dedi mınıstrdiń orynbasary. Mereke qonaqtary Avstrııanyń pavılonymen tanysyp, kúsh energııasyn tamashalady. Bul pavılonnyń ereksheligi de sol, kelýshiler «Bolashaqtyń energııasyn» ózderi óndiredi. Máselen, memlekettiń ásem tabıǵatyn, kórikti óńirlerin, keremet qalalaryn tamashalaǵyńyz kelse, LED ekranǵa jalǵanǵan velosıpedti tebýińiz kerek. Sol kezde ekrandy iske qosatyndaı energııa jınalyp, beınematerıaldardy kóresiz. Munda «oınap júrip» energııa jınaıtyn, sol arqyly iske qosylatyn birneshe qurylǵy ornatylǵan. Pavılonda velosıped basqyshyn aınaldyrǵanda qansha energııany óndirýge bolatynyn da bilýge bolady. Aıtalyq, jeńil kólikti bir shaqyrym qashyqtyqqa energııamen qamtamasyz etý úshin basqyshty 12 saǵat boıy aınaldyrý qajet. Sol sııaqty bir úıge qajetti energııany 5000 saǵat óndirýge týra keledi. Al kompıýterde bir klık jasaý úshin velosıped basqyshyn 52 sekýnd aınaldyrsa jetkilikti. Budan bólek, átkenshekterdi teýip, mýzykany oınatýǵa múmkindik bar. Osylaısha, avstrııalyqtar kınetıkalyq energııanyń, ıaǵnı qozǵalys kúshiniń mańyzdylyǵyn kórsetken.
Syrt kóz – synshy
Anastasııa BONDARENKO, avstrııalyq gıd: – Avstrııany mýzykasyz jáne velosıpedsiz elestetý múmkin emes. Sol sebepti, biz pavılondy jasaqtaý barysynda osy eki nárseni barynsha paıdalanyp, balamaly energııanyń mańyzdylyǵyn aıshyqtaýǵa tyrystyq. Munda energııa óndirý úshin barlyq ınstallıasııalardy qozǵaý qajet, aınaldyrý kerek jáne qol jumsaýǵa mindettisiz. О́ıtkeni, energııanyń basty kózi – adamnyń ózi, onyń aqyly, júregi men kúshi. Sonyń bári sarqylmas energııa kózi bolyp sanalady. Peter VISKOVSKII, avstralııalyq qonaq: – Kórme kesheniniń ınfraqurylymy óte yńǵaıly jasalǵan eken. Munda birer kúnnen keıin bastalatyn Astana ekonomıkalyq forýmyna qatysatyn bolǵandyqtan, áli biraz kún aıaldaıtynym anyq. Álem pavılondarymen tanysýǵa múmkindigim bar, ásirese, AQSh, Venesýela elderiniń taqyryptary qyzyqtyrady. Astanaǵa alǵash kelip turmyn, arhıtektýralyq ár alýandyǵymen Las-Vegasqa uqsaıtyn ádemi qala eken. Osy damý qarqynyn joǵaltpasa, týrıster kóp at basyn buratyn aımaq bolatyny sózsiz.
Ashat Qoıshyǵarauly, «Egemen Qazaqstan»
Sýretterdi túsirgen Erlan Omarov, «Egemen Qazaqstan»