Mysaly, Muhtar Áýezov atyndaǵy Ońtústik Qazaqstan memlekettik ýnıversıteti sport jáne týrızm fakýltetiniń 1-kýrs stýdenti Danııar Meldebek erkin kúresten Úndistanda ótken Azııa chempıonatynda qola júldege ıe bolsa, Atyraýda ótken Qazaqstan jastar oıyndarynda 84 kılo salmaq dárejesinde júldeli 2-shi orynnan kórindi. Endi bıyl álem birinshiligine qatysýdy josparlap otyr. Jaqynda ǵana sport sheberi ataǵyna qol jetkizgen ol erkin kúres seksııasyna jeti jasynan bastap qatysypty. Al taekvondoshy Nurqanat Qojahmet 2020 jyly ótetin Tokıo Olımpıadasynda top jarýdy maqsat etedi. Árıne, top jarǵannan buryn Olımpıadaǵa joldama alý da ońaı sharýa emes. Ol úshin irikteý jekpe-jekterinde úzdikter qatarynan kórinip, álemdik reıtıngte óz salmaq dárejesinde alǵashqy segizdikte bolýy kerek. Mundaı talaptardy jaqsy biletin Qojahmet jattyǵýlaryn eseleı túsýde. Qazirgi kórsetkishteri de maqtan eterlikteı. Sport sheberi. Qara belbeýden 1-shi dan ıegeri. Qazaqstan chempıonatynda jáne túrli deńgeıdegi jarystarda birneshe ret jeńiske jetken. Halyqaralyq arenada 2015 jyly jasóspirimder arasynda Qytaı eliniń Taıbeı qalasynda ótken Azııa birinshiliginde 68 kılo salmaqta qola júldege ıe boldy. Al 2016 jyly Birikken Arab Ámirlikterinde ótken G-1 dárejesindegi III Fujairah open jarysynda jastar arasynda qarsylas shaq keltirmeı, altyn júldege ıe boldy. Bıyl 74 kılo salmaq dárejesine aýysqan sportshy – M.Áýezov atyndaǵy OQMÝ-dyń 2-kýrs stýdenti. Qazirgi tańda ol jazǵy Ýnıversıada men Qazaqstan kýbogyna jáne kúzde ótetin Qazaqstan birinshiligine daıyndalýda. Qojahmetti sportqa 10 jasynda ákesi alyp kelgen. Inisi Almat Qojahmet te taekvondodan biraz bıikterdi baǵyndyryp úlgergen. «Shymkentte sportqa jaqsy kóńil bólinýde. Muny Qazaqstanda túrli qalalarǵa jarystarǵa barǵanda baıqadym. Bizdiń sport keshenderiniń jaı-kúıi, sondaǵy jaǵymdy atmosfera Astana, Almaty qalalarynan sonshalyqty tómen emes. Aldyńǵy úshtikte dese de bolady. Sondaı-aq, bizdiń ýnıversıtette sportpen aınalysýǵa barlyq jaǵdaı jasalǵan. Rektorymyz Jumahan Myrhalyqov aǵaıymyzǵa aıtar alǵysymyz zor! Bizdiń elimizde áli eshkim Olımpıadada taekvondodan altyn almady. 2008 jyly taekvondoshy Arman Shilmanov qola alǵan edi. Odan keıin eshqandaı jetistikke jete almadyq. Osy olqylyqtyń ornyn toltyryp, Olımpıada joldamasyna ıe bolý úshin barymdy salamyn», deıdi Nurqanat Qojahmet.
Ǵalymjan Elshibaı, «Egemen Qazaqstan»
Shymkent