UBT jańa formatta ótkiziledi

Spıkerdiń sózinshe, bıyl túlekter UBT-ny 5 pán boıynsha tapsyrady. «Qa­zaq­stan tarıhy, mate­ma­tıkalyq saýat­tylyq, oqý saýattylyǵy 20 tapsyrmadan, shekti deńgeıi – ár pánnen keminde 5 baldan já­ne tańdalǵan mamandyqqa sáı­kes 2 beıindi pánnen 30 tap­syrmadan, shekti deń­geıi 15 baldan kem bolmaýy tıis. 120 tes­tileý tapsyrmasy bo­ıynsha túlek maksı­maldy 140 ball alýy múmkin. Tap­syr­malardy oryndaýǵa 3 saǵat 50 mınýt ýaqyt bólinedi», dedi Darhan Ah­met-Zákı.  Ulttyq testileý orta­ly­ǵynyń máli­me­tinshe, bıyl UBT-ǵa qatysýǵa 92 827 túlek nıet bildirip, aryz jaz­ǵan. «Olar bıylǵy mektep bitirýshilerdiń jalpy sanynyń 71 paıyzyn qurap otyr. UBT tapsyrýǵa nıetti 69 209 túlek qazaq tilinde, al 23 618 túlek orys tilinde tap­syrady. UBT 165 tapsyrý pýnktiniń 1431 aýdıto­rııasynda ótkiziledi. Bul aýdıtorııalar baılanys sıgnaldaryn bógeıtin quryl­ǵylarmen, metall detektor­larymen, UBT barysyn baqylaý jáne jazý beınekameralarymen, sondaı-aq ınternet arqyly onlaın taratý kameralarymen jabdyqtalǵan», dedi departament dırektory.  Sondaı-aq, ata-analarǵa yńǵaıly jaǵdaı qamtamasyz etý maqsatynda 108 pýnkttegi UBT barysy monıtorǵa shy­ǵarylyp, kórsetiledi. Ádet­tegideı, UBT ót­kizý orynda­rynda medısınalyq qyz­met pen quqyq qorǵaý organ­darynyń ókil­­deri jumys istep, aýyz sý jáne taǵam ónimderin satý oryndary qyzmet kórse­tedi.  «UBT belgilengen tártip boıynsha ótkizilýi men ere­jelerdiń oryndalýyn qadaǵalaý úshin testileý ótkiziletin pýnkt­terge Bilim jáne ǵylym mınıstrligi tarapynan jáne kolledjderdiń oqytýshylary jiberildi. Uıym­dastyrý máselelerin sheshý úshin el óńirlerinde jer­gilikti JOO-nyń, bilim bólimderiniń, ákimshi­lik­terdiń, quqyq qorǵaý or­gandarynyń, qoǵamdyq uıym­dar men BAQ ókilderinen qu­ralǵan memlekettik komıssııalardy qurý qolǵa alyndy», deıdi departament basshysy. Sonymen qatar, ol mı­nıstr­liktiń buıryǵymen testi­leý tapsyrmalary men tehnıkalyq aqaýlyqtar jó­nindegi apellıasııalyq aryz­dardy qarastyratyn Respýb­lıkalyq apellıasııalyq ko­mıs­sııamen qatar, jer-jerde apellıasııalyq komıssııalar kurylǵanyn atap ótti. «Tártip burynǵydaı, apel­lıasııalyq aryzdar UBT nátı­jeleri jarııalanǵannan ke­ıingi kúni saǵat 13.00-ge deıin qabyl­danyp, bir kún­tiz­­belik kún ishinde qaras­ty­rylady», deıdi D.Ahmet-Zákı. Aıta ketetin jaıt, emtıhan materıal­dary qupııa­lyqty qamtamasyz etý nus­qaýlyǵynyń qatań talaptarymen, 99 myń dana taralymmen basylyp, býylǵan.

Raýan QAIDAR, «Egemen Qazaqstan»