Aıtqandaı-aq, Ekibastuzdyń týǵan kúni merekesinde Máshhúr Júsip eskertkishi ashyldy. Bıiktigi 6 metr bolatyn qoladan quıylǵan eskertkishtiń kórinisi erekshe. Ǵulamanyń beınesi qalaǵa kelgen árbir qonaqty oıly júzimen qarsy alyp, aınalaǵa kóz sala qarap turǵandaı. Ǵulama Máshhúr babamyzdyń eskertkishi óziniń esimimen atalatyn Ekibastuzdyń ortalyq kóshesindegi baq ishine qoıyldy. Alyp keshen avtorlary eskertkishti músindegen aǵaıyndy Jaýbasar men Jarylǵasyn Iǵlanbekuly. Músinshilerdiń aıtýlarynsha Máshhúr Júsiptiń ómiri jaıly oqyp, bilip, zerdelep, zerttep baryp, músindi jasaýdy qolǵa alypty. Bul kúni Ekibastuzdyń 60 jyldyǵymen qala turǵyndaryn quttyqtaýǵa kelgen oblys ákimi Bolat Baqaýov ta eskertkishtiń ashylý rásimine qatysty. Ekibastuzdyń Qarasý aýyly arqyly qara jolmen shańdatyp tótesinen túsip Jańajoldaǵy Máshhúr babamyzdyń kesenesine de jetýge bolady. О́tkensiz-búgin joq. Qazaqtyń uly shejireli ómiri-urpaǵyna amanat degen osy. Osy kúni eskertkishtiń ashylýyna oraı ǵulamanyń týǵan týystary, Máshhúr tanýshy ǵalymdar, qala jurtshylyǵy kóptep jınaldy.
Farıda Byqaı
«Egemen Qazaqstan»
Pavlodar oblysy