Portýgalııa bıliginiń habarlaýynsha, órtengen kólikterden 30, jol mańynan 17, Koımbra qalasynyń mańyndaǵy Pedrogan-Grandı kentinen 11, basqa jerlerden taǵy birneshe adamnyń denesi tabyldy. Qaza tapqandardyń ishinde tórt bala bar. Úkimet basshysy Antonıý Koshtanyń aıtýynsha, qaza tapqandardyń sany artýy múmkin.
Sheteldik basylymdardyń habarlaýynsha, 60 adamdy ártúrli deńgeıdegi kúıik shalǵan. Oqıǵa ornyna júzden astam órt kóligi, avıasııa, myńdaǵan qutqarýshy men órt sóndirýshi jumyldyrylǵan. Biraq órt bir ýaqytta 4 baǵyt boıynsha jyldam taraýda. Sol sebepti qalǵan eldi mekenderdi órtten saqtaý úshin adam jetispeýi múmkin, deıdi VVS.
Premer Mınıstr bul oqıǵany úlken tragedııa dep atady. Al Portýgalııa prezıdenti Marselý Rebelý dı Soza apat ornyna baryp, qaza tapqandardyń otbasymen kezdesýde.
Portýgalııa órt jıi bolatyn óńirge jatady. Qazirdiń ózinde bul elde aýa temperatýrasy 40 gradýstan joǵary bolyp tur. Bir aıta keterligi, byltyr tilsiz jaýǵa 4 myń órt sóndirýshi men 26 ushaq jumyldyrylǵan.