Ekijaqty kezdesý barysynda Qazaqstan men Dúnıejúzilik bank arasyndaǵy yntymaqtastyqtyń ózekti máseleleri talqylandy. Búginde bizdiń elde osy banktiń qoldaýymen jalpy quny 8,1 mıllıard dollar kólemindegi 46 joba iske asty.
Gúlshara Ábdiqalyqova bıyl Qazaqstan men Dúnıejúzilik bank arasyndaǵy yntymaqtastyqqa 25 jyl tolyp otyrǵanyn atap ótti. Bank shırek ǵasyrda elimizdegi jekemenshik sektordy damytýǵa, qurylymdyq reformalar júrgizýge jáne ınfraqurylymdy jaqsartýǵa ózindik úles qosty.
Memlekettik hatshy Qazaqstan 2050 jylǵa qaraı ozyq damyǵan 30 eldiń qataryna qosylýdy maqsat etip otyrǵanyn aıtty. Elbasy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty halyqqa joldaýynda ekonomıkalyq ósimniń jańa modelin qalyptastyrý mindeti qoıyldy.
Gúlshara Ábdiqalyqova 2017 jyly Qazaqstan Dúnıejúzilik banktiń «Bıznes júrgizý jeńildigi» reıtınginde 190 eldiń arasynda 51-orynnan 35-orynǵa kóterilgenin atap ótti. «Táýelsizdik jyldarynda elimizge kelgen sheteldik tikeleı ınvestısııanyń jalpy kólemi shamamen 280 mıllıard dollar boldy», – dedi Memlekettik hatshy.
Taraptar ekijaqty yntymaqtastyqty damytýdyń qazirgi qarqynyna qanaǵattanatynyn jetkizdi.
Kezdesý sońynda Gúlshara Ábdiqalyqova A.Braýnǵa amandyq tilep, bankke múshe elderdiń ornyqty ekonomıkalyq ósimin qamtamasyz etýde tabysqa jetýine nıettestigin bildirdi.