Is-sharaǵa «Halyqaralyq baǵdarlamalar ortalyǵy» AQ vıse-prezıdenti Meıirjan Alpysbaı, «Halyqaralyq baǵdarlamalar ortalyǵy» AQ vıse-prezıdenti Zýlfııa Tórebekova jáne Konkýrstyq rásimderdi uıymdastyrý departamentiniń dırektory Aıman Áýbakirova qatysty.
Meıirjan Alpysbaı sóılegen sózinde atap ótkendeı, jańa ekonomıkalyq saıasat pen memleketti jańǵyrtý basymdyqtary jaǵdaıynda Qazaqstan úshin eldiń sapaly áleýetin arttyrý jáne tıimdi kásibı resýrsty qalyptastyrý erekshe mańyzǵa ıe bolyp otyr. Osyǵan baılanysty, «Bolashaq» halyqaralyq stıpendııasy arqyly ozyq tájirıbe men bilimdi úlgi alý respýblıkada bastalǵan Jańǵyrtýdyń úshinshi tolqyny turǵysynan da basym bolyp qalatynyn mekeme basshysy atap ótti.
Meıirjan Alpysbaı OKQ-daǵy brıfıngte sóılegende: «Bolashaq» halyqaralyq stıpendııasy bilim berý salysyndaǵy qazaqstandyq alǵashqy serpilisti jobalardyń biri bolyp, kásibı mamandardy daıarlaý júıesi retinde eldiń kadrlardaǵy ósip kele jatqan qajettilikterine tolyq beıimdelýge umtylýda. Baǵdarlama mańyzy «100 naqty qadam» Ult josparynyń ınstıtýttyq reformalary, eldiń ındýstrıaldy-ınnovasııalyq damýy jáne Memleket basshysynyń «Jańǵyrtý 3.0» joldaýynda belgilengen «adamı kapıtal sapasyn jaqsartý» boıynsha mindetter aıasynda nyǵaıady, – dep atap ótti.
Bilim jáne ǵylym mınıstrligi «100 naqty qadam» Ult jospary men «Jańǵyrtý 3.0» iske asyrý sheńberinde «Bolashaq» stıpendııasyn ákimshilendirýdiń birqatar negizgi parametrin qaıta qarastyrdy.
23 mamyrda Qazaqstan Respýblıkasy Úkimetiniń Qaýlysymen «Bolashaq» stıpendııasyna úmitkerlerdi irikteýdiń dańa qaǵıdalary qabyldandy, sondaı-aq konkýrstyq irikteý rásimine ózgerister engizildi.
Birinshi. IELTS 6.5 jáne odan joǵary sertıfıkaty, sondaı-aq GPA 3.3 jáne odan joǵary dıplomy bar tulǵalar úshin «jalpy konkýrs» jańa sanaty engizildi. Úmitkerlerdiń osy sanaty úshin jumys ótili men jumys berýshi ótiniminiń bolýyna talap qoıylmaıdy. Osy sanat magıstr dárejesin alý úshin stıpendıattardyń basqa sanattarymen qatar, 2 aıǵa deıingi merzimde oqý aldyndaǵy daıarlyqtan (pre-master's) ótý múmkindigin beredi.
Ekinshi. Akademııalyq baǵdarlamalar (magıstratýra, doktorantýra, rezıdentýra) úshin úmitkerlerdiń barlyq sanattaryna bakalavr nemese maman dıplomynyń ortasha balyna qoıylatyn talaptar 3.0-den 3.3 (4.0/4.33-ten) GPA deńgeıine deıin ózgertildi.
Úshinshi. «Magıstratýra» baǵdarlamasy boıynsha úmitkerlerdiń barlyq úlestik sanattary úshin aǵylshyn tilin meńgerý deńgeıiniń ólshemsharttary IELTS júıesi boıynsha 5.0 baldan 5.5 balǵa deıin kóterildi. Sonymen, «ınjenerlik-tehnıkalyq mamandyq» sanaty boıynsha úmitkerlerge qoıylatyn talaptar burynǵy deńgeıde – IELTS 5.0 qalady.
Tórtinshi. Stıpendııa taǵaıyndaý úshin úmitkerlerdi konkýrstyq irikteý rásimine ózgerister engizildi. 2017 jyldan bastap konkýrs 6 (alty) kezeńnen turatyn bolady:
Birinshi kezeń – úmitkerlerdi ýájdemelik jáne usynym hattar boıynsha ázirlengen ólshemsharttarǵa sáıkes aldyn ala irikteý.
Ekinshi kezeń – úmitkerdiń shet tilin bilýi deńgeıin anyqtaý.
Úshinshi kezeń – úmitkerdiń memlekettik tildi bilýi deńgeıin anyqtaý.
Tórtinshi kezeń – úmitkerlerdi psıhologııalyq dıagnostıkadan ótkizýdi, Qazaqstan Respýblıkasy Konstıtýsııasy men tarıhyn bilýin testileýdi qamtıtyn keshendi testileý.
Besinshi kezeń – Táýelsiz sarapatamalyq komıssııamen jeke áńgimelesý, onda úmitkerlerdiń kásibı daıarlyǵy deńgeıi, sondaı-aq mamandaný boıynsha Qazaqstan Respýblıkasynyń strategııalyq jáne baǵdarlamalyq qujattaryn bilýi baǵalanady.
Altynshy kezeń – QR Memlekettik hatshysy tóraǵalyq etetin Shetelde kadrlar daıarlaý jónindegi respýblıkalyq komıssııanyń qorytyndy materıaldardy qaraýy.
Taǵylymdamadan ótý jóinide. Shetelde kadrlar daıarlaý jónindegi respýblıkalyq komıssııanyń 2017 jylǵy 13 naýryzdaǵy sheshimine sáıkes baǵdarlama sheńberinde taǵylymdamadan ótý úshin «ǵylymı qyzmetkerler» jáne «Astana» halyqaralyq qarjylyq ortalyǵy qyzmetkerleri» sanattary belgilendi.
Altynshy. Jumys óteliminiń óńirde 3 jyldyq balamaly merzimimen, Astana men Almaty qalalaryndaǵy jumys óteliminiń 5 jylynyń ornyna, «ortalyq-óńir» úlgisi boıynsha saralanǵan tetigi engizildi. Osy tetik túlekterdiń barlyq sanattaryna qatysty.
«Bolashaq» halyqaralyq stıpendııasy 1993 jyly 5 qarashada Qazaqstan Respýblıkasy Prezıdenti N.Á. Nazarbaevtyń Qaýlysymen jarııalandy. 24 jyl ishinde ekonomıka jáne áleýmettik sala sektorlaryndaǵy ulttyq eńbek naryǵy úshin «Bolashaq» baǵdarlamasy boıynsha 9,5 myńnan astam joǵary bilikti maman daıarlandy, onyń ishinde el óńirleri úshin 4000 ınjenerlik-tehnıkalyq qyzmetker, 2000 astam bilim salasyndaǵy maman jáne shamamen 700 joǵary bilikti dáriger.