Bul baıqaýǵa otyzdan astam qysqametrajdy kórkem fılmderdiń ssenarııleri tússe, olardyń ishinen bes jumys iriktelip alyndy. Sonymen, shyǵarmashylyq-óndiristik birlestik tańdaýy Venera Qaıyrjanovanyń «Tyǵylmaq», Arman Baımuratovtyń «Taqııa», Alen Rahmetalıevtiń «Tózim», Berik Jahanovtyń «Keshirim», sondaı-aq, Ardaq Jylysbaevanyń «Jut» atty ssenarıılerine toqtady. Shart boıynsha baıqaýǵa jas avtorlarmen qatar, óz isiniń kásibı mamandary da qatysa alatyn. Baıqaýǵa qatysýshylardyń ishinde Kenjebek Shaıqaqov, Ǵazız Nasyrov, Ardaq Jylysbaeva jáne Tımýr Maqajanov sııaqty baıyrǵy tájirıbeli avtorlar da boldy. «Qazaqfılm» AQ Sarapshylar keńesiniń teń tóraǵasy Bekbolat Shekerov baıqaý qaǵıdasy týraly: – Bizge jiberilgen ssenarıılerdiń ishinen beseýin iriktep aldyq. Olardyń barlyǵy bıyl óndiriske jiberiledi. Tórt týyndyǵa avtorlardyń ózderi rejısserlik etedi. Al «Juttyń» ssenarııin Jandos Espenbetov esimdi jas rejısserge berýdi jón sanadyq. Mundaı tájirıbe «Debıýttiń» tájirıbesinde kópten beri bolmaǵan edi, – dedi. Al «Qazaqfılm» qysqametrajdy kórkem kartınalardy 1959 jyldan beri túsirip keledi. Bertinde kınostýdııada «Debıýt» shyǵarmashylyq-óndiristik birlestigi qurylyp, búginde ony Anar Qashaǵanova basqarady. Biraz jyldardan beri «Debıýt» shyǵarmashylyq-óndiristik birlestigi birqatar ssenarıısterdiń baǵyn ashyp, jas kınematografısterdiń tanylýyna múmkindik berip keledi. Birlestiktiń de basty maqsaty – jas kınematografısterdi ssenarıı jazýdan bastap, post-prodakshnǵa deıingi kıno óndirisiniń úderisimen tanystyrý.
Aınash ESALI, «Egemen Qazaqstan» ALMATY