Úsh aıǵa sozylǵan irikteý kezeńinde 50 oqý ornynyń túlekterinen júzdegen ótinish tústi. Onyń ishinde Astana, Almaty jáne Qaraǵandy oblystary erekshe belsendilik tanytty.
Alǵashqy kezeńde baıqaýǵa qatysýshylar úsh tapsyrma oryndaýlary kerek boldy: ýájdemelik esse jazý (joǵary ball 10) jáne úmitkerdiń taldap, saraptaý mashyǵyn, basymdylyq beretin máselelerdi anyqtaı bilý jáne tez sheshim qabyldaı alý qabiletin anyqtaýǵa arnalǵan, árqaısy 5 baldan baǵalanatyn eki tapsyrma.
Alǵan baǵalar negizinde 222 qatysýshy kelesi kezeńge joldama aldy.
«Biz túlekter tarapynan týyndaǵan úlken qyzyǵýshylyqqa qýanyshtymyz. «Jas О́rken» taǵylymdama baǵdarlamasy jas túlektiń tabysty qyzmetke qol jetkizýine oń áserin tıgizerine senimdimin. Sonymen qatar, irikteý kezeńiniń tolyǵymen ashyq ári ádil ótkenin, barlyq qatysýshylarǵa teń jaǵdaı jasalǵanyn atap ótkim keledi. Ýájdemelik esse avtordyń jeke qasıetteri men jetistikteri, taqyrypty túsinýi men asha bilýi, dáıekteriniń salmaqtylyǵy, jalpy logıkasy men oıyn jetkizý júıesi jáne árıne, mátinniń kásibı turǵyda jazylýy sııaqty t.b sıpattamalarǵa sáıkes baǵalandy» dep atap ótti «Samuryq-Qazyna» Korporatıvti Ýnıversıtetiniń dırektory Gúlmıra Raısova.
Baıqaýdyń kelesi kezeńi shildeniń ekinshi jartysynda bastalady. Ekinshi kezeń baıqaýǵa qatysýshynyń áleýetin anyqtaıtyn test túrlerinen turady. Úshinshi kezeń Astanada, «Samuryq-Qazyna» Korporatıvti Ýnıversıtetinde ótedi. Úmitkerler yntasyn jáne iske yńǵaıyn, qarym-qabiletin anyqtaıtyn suhbatqa qatysady.
Ár kezeńnen ótken úmitkerlerdiń tizimderi https://www.skcu.kz/zhasorken/ saıtynda jarııalanyp otyrady, sonymen qatar, árqaısyna ótinishterinde kórsetken elektrondy pochtalary arqyly hat joldanady.
Eske sala keteıik, barlyq kezeńnen ótken 20 úmitker jeńimpaz atanyp, «Samuryq-Qazyna» Korporatıvti Ýnıversıtetinde dáris alady, sosyn Qazaqstannyń ulttyq kompanııalaryna taǵylymdamaǵa jiberiledi. Baǵdarlama 2 jylǵa josparlanǵan. Bul ýaqyt ishinde tálimgerlerge stıpendııa men taǵylymdamadan ótýge barǵan aımaqqa jol-puly, jatyn-orny shyǵyndary óteledi.