Sý resýrstary jáne ırrıgasııa mınıstrligi Ǵylym jáne joǵary bilim mınıstrligimen birlesip «Sýdy únemde – bolashaqty saqta!» taqyrybynda ekologııalyq saǵat uıymdastyrdy. L.N.Gýmılev atyndaǵy Eýrazııa ulttyq ýnıversıtetinde ótken basqosýda stýdentter tabıǵatty qorǵaýǵa, sýdy saqtaýǵa qatysty usynystarǵa erekshe yqylas tanytty.
Mazmundy kezdesýge Sý resýrstary jáne ırrıgasııa mınıstri Nurjan Nurjigitov, Senat depýtaty Bekbolat Orynbekov, EUÝ basqarma tóraǵasy-rektory Erlan Sydyqov, EUÝ Dırektorlar keńesiniń tóraǵasy Darhan Myńbaı qatysty. Ekosaǵatqa ýnıversıtettiń 500-den astam stýdenti jıylsa, elimizdiń ózge joǵary oqý oryndarynan 2000-nan astam stýdent onlaın formatta qosyldy. Qonaqtar stýdentterge byltyr qabyldanǵan Sý kodeksindegi jańashyldyqty, ekonomıka salalarynda sýdy únemdeýdi qamtamasyz etý boıynsha atqarylyp jatqan jumysty jan-jaqty baıandady. Sol sekildi turmystyq jaǵdaıda sýdy únemdeý tásilderi, Soltústik Araldy saqtaý, sý sharýashylyǵy ınfraqurylymyn damytý, jerasty sýyn ıgerý baǵytyndaǵy jobalar nazardan tys qalmady. Memleket deńgeıinde iske asyp jatqan jobalardyń retin, negizgisin Sý resýrstary jáne ırrıgasııa mınıstri Nurjan Nurjigitov aıtyp berdi.
«Qazir álemde aýyzsý tapshylyǵyn kórip otyrǵan elder bar. Sondyqtan sý máselesi ekologııalyq taqyryp qana emes, eldiń turaqty damýy men qaýipsizdigi máselesine aınalyp kele jatyr. Memleket basshysy atap ótkendeı, sý resýrstaryn tıimdi ári uqypty paıdalaný – eldiń ornyqty damýynyń negizgi basymdyqtarynyń biri. Sondyqtan sýdy únemdeý memlekettiń ǵana emes árbir azamattyń ortaq jaýapkershiligi dep túsiný kerek. Osyǵan deıin sý resýrstaryn basqarý júıesin damytýdyń 2024–2030 jyldarǵa arnalǵan tujyrymdamasyn bekittik. Sol tujyrymdamada 17 ındıkator belgiledik, boljamdardy qaperge aldyq. Jas mamandar sý resýrstaryn tıimdi basqarý, jańa tehnologııalardy engizý, ekologııalyq mádenıetti qalyptastyrý isinde aıryqsha ról atqarady. Sizderdiń bilimderińiz ben jańa ıdeıalaryńyz keleshekte sý qaýipsizdigin qamtamasyz etýge úlken úles qosa alady», dedi N.Nurjigitov.
Budan soń EUÝ Dırektorlar keńesiniń tóraǵasy Darhan Myńbaı ýnıversıtettiń maman daıarlaý isine qosqan úlesi týraly baıandady.
«Byltyr jeltoqsanda ýnıversıtet dırektorlar keńesiniń sheshimimen «Jaratylystaný ǵylymdary fakýlteti» «Jaratylystaný ǵylymdary ınstıtýty» bolyp qaıta quryldy. Instıtýt hımııa, geografııa, bıotehnologııa, bıologııa, ekologııa salalarynda ǵylym-bilim berý kadrlaryn qalyptastyrady. Búginde ınstıtýtta 2 702 stýdent bilim alyp jatyr. Instıtýt qurylymynda gıdrologııa jáne sý resýrstary salasyna maman daıarlaý erekshe oryn alady. Osy kúnge deıin ýnıversıtten 316 gıdrolog maman bilim aldy, áli de oqyp jatqan stýdentter barshylyq. 2024 jyly Taraz qalasynda Qazaq ulttyq sý sharýashylyǵy jáne ırrıgasııa ýnıversıteti ashyldy. Bul elimiz úshin óte mańyzdy qadam bolǵany anyq», dedi D.Myńbaı.
Osy kúni Eýrazııa ýnıversıteti stýdentteriniń, oqytýshylary men jas ǵalymdarynyń úzdik zertteý jumystary men jobalary tanystyryldy. Ekosaǵat qorytyndysynda qonaqtar stýdentterdi qyzyqtyrǵan suraqtarǵa jaýap berdi.