Túrkistanda Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń bazasynda «Qoja Ahmet Iаsaýı izimen: qolónershiler» atty halyqaralyq mádenı-ǵylymı sımpozıým óz jumysyn bastady.
Is-sharaǵa ǵylymı jáne sarapshylyq qoǵamdastyq, memlekettik qurylymdar men halyqaralyq uıymdardyń ókilderi, sondaı-aq kórshiles memleketterden kelgen delegasııalar qatysty.
Senat tóraǵasy Máýlen Áshimbaevtyń forým qatysýshylaryna arnalǵan quttyqtaý hatyn Senat depýtaty, Qoja Ahmet Iаsaýı atyndaǵy Halyqaralyq qazaq-túrik ýnıversıteti О́kiletti keńesiniń múshesi Darhan Qydyráli oqyp berdi. Senat spıkeri óz joldaýynda Memleket basshysynyń Qoja Ahmet Iаsaýı esimin ulyqtaý men onyń rýhanı murasyn nasıhattaý isine qosqan erekshe úlesin atap ótti. Sondaı-aq ortaq tarıhı tulǵalardyń ósıetterin birlese zertteýdiń mańyzdylyǵyna aıryqsha mán berildi, bul aımaq elderi arasyndaǵy yntymaqtastyqtyń jańa deńgeıge kóterilýine yqpal etýge tıis.
Sımpozıým barysynda qatysýshylar túrki áleminiń ortaq mádenı murasynyń mańyzdy bóligi retindegi «ahılik» dástúriniń mánin, sonymen qatar rýhanı qundylyqtardy saqtaý, gýmanıtarlyq baılanystardy nyǵaıtý jáne halyqaralyq yntymaqtastyqty damytý máselelerin talqylady. Forýmnyń ashylýynda aıtylǵandaı, bul jıyn ortaq tarıhı-mádenı baǵdarlardy ilgeriletýge jáne baýyrlas elder arasyndaǵy ózara is-qımyldy keńeıtýge tyń serpin berýdi kózdeıdi.