BQO jastar saıasaty máseleleri basqarmasynyń basshysy Aıan Sakoshevtiń aıtýynsha, sharanyń maqsaty - jastardyń jumysqa ornalastyrý múmkindikterin keńeıtý, jumyssyz jastardy jumysqa ornalastyrý, jastardy memlekettik baǵdarlamalar, halyqaralyq jáne memlekettik bilim berý baǵdarlamalary týraly aqparattandyrý.
Jármeńkege oblystaǵy "Steklo-Servıs" JShS, "Gıdroprıbor" ǴZI», "Batys Qazaqstan elektr jelilerin taratý kompanııasy" AQ sııaqty iri óndiris oshaqtary men kásiporyndar, Oral qalasy men aýdandardaǵy memlekettik mekemelerden barlyǵy 100-ge jýyq jumys berýshi qatysyp, 1800-den astam bos jumys oryndaryn usyndy. Jármeńke barysynda barlyǵy 700-den astam jas óz túıindemelerin tapsyrdy.
Sonymen qatar, jármeńke barysynda jastarǵa Elbasynyń "100 naqty qadam" Ult josparynyń birinshi baǵyty - kásibı memlekettik apparat qurý reformasyn júzege asyrý maqsatynda memlekettik qyzmetke qalaı ornalasýǵa bolatyndyǵy, konkýrsqa túsý tártibi, testileýden ótý jáne basqa máseleler jóninde aqparat berildi.
QR Prezıdenti janyndaǵy Memlekettik basqarý akademııasyna qabyldaý boıynsha semınar ótkizilip, Nazarbaev ýnıversıtetiniń ókili osy oqý ornyna túsý múmkindikteri boıynsha málimet berdi.
Sondaı-aq, jas mamandarǵa túıindeme toltyrý, áńgimelesýden ótý jáne ózge máseleler boıynsha keńes berilip, "Atameken" ulttyq kásipkerler palatasy BQO fılıaly ókilderiniń jastarǵa óz kásibin ashý boıynsha ótkizgen trenıngterine 100-ge jýyq jas qatysty.
«Atalmysh bos jumys oryndary jármeńkesi jastardy bos júrgizbeı, jumysqa ornalastyrý, sondaı-aq óz kásibin ashqysy keletin nemese memlekettik qyzmetke kirgisi keletinderge, joǵary oqý oryndary men tehnıkalyq bilim berý uıymdaryn bıyl aıaqtaǵan túlekterge baǵyt berý maqsatynda uıymdastyryldy. 2016-2017 oqý jylynda oblys boıynsha joǵary oqý oryndaryn 7478 túlek aıaqtap otyr. Sonyń 4 myńǵa jýyǵy - kúndizgi bólim stýdentteri. Aldaǵy ýaqytta osy túlekterimizdiń, basqa da jumyssyz júrgen jastarymyzdyń jumysqa ornalasýy boıynsha monıtorıng júrgizilip, olardy jumyspen qamtý sharalary kúsheıtiletin bolady», dedi A.Sakoshev.
Aıta keteıik, óńirde Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda da jastardy jumyspen qamtý sharalary qolǵa alynýda. Mysaly, bıyl 515 jas mamandy jastar tájirıbesine joldaý kózdelse, alǵashqy alty aıdyń ishinde sonyń 263-i jiberildi.