Áıgili Kenen aqynnyń aqyndyq, ánshilik ónerine bastaý bolǵan kóne dombyra Qordaı aýdany, Kenen aýylyndaǵy Kenen Ázirbaev atyndaǵy ádebı-memorıaldyq mýzeıde saqtaýly tur. Bul eshqandaı da kóshirme emes, bala kúninde aqynnyń shertken qasıetti aspaby. Mýzeı qyzmetkeri Lázzat Barmenqulovanyń aıtýynsha, aqyn bul dombyrany on bir jasynda ustaǵan eken. Bala Kenenniń ónerge yntyqtyǵyn baıqaǵan aqynnyń týys aǵasy Erkebaı Bazaruly muny óz qolymen jasap beripti. Talaı án men jyrdyń dúnıege kelýine sebepshi bolǵan, Kenen keńistiginiń kórkem deńgeıge kóterilýine jol ashqan bul dombyra aýyldyń, aýdannyń ǵana emes, tutas ónersúıer qaýymnyń qundy jádigeri. Ǵasyrdan astam tarıhy bar qara dombyrany aqynnyń qyzy Tórtken Kenenqyzy mýzeıge syılaǵan eken.
Qazaq tarıhyndaǵy qıly kezeńderdiń kýási bolǵan Kenen aqynnyń taǵdyr joly ońaı bolmaǵan. Qos birdeı perzentinen aıyrylyp, armanda qalǵan ol «Bazar-Nazar» degen qasiretti ánin shyǵarady. Bazar men Nazardy joqtap salǵan áni áli kúnge deıin tyńdarman qulaǵynda. Mýzeıdegi taǵy bir qundy jádigerdiń biri tobylǵy aǵashynan jasalǵan kádimgi syldyrmaq oıynshyǵy. Aqyn muny otyzynshy jyldary óz qolymen jasap, sábı Bazar men Nazardy jubatyp, oınatqan eken. Bul jádiger de kóneniń kózindeı, asyldyń synyǵyndaı bolyp syr shertedi.
Hamıt ESAMAN, «Egemen Qazaqstan»
Jambyl oblysy