Basqosýǵa Astana qalasy ákiminiń orynbasarlary Ermek Amanshaev pen Malıka Bekturova, Jastar saıasaty máseleleri jónindegi basqarma basshysy Ashat Oralov, ýnıversıtet rektory apparatynyń jetekshisi Dýman Aıtmaǵambetov, EKSPO-2017 eriktiler shtabynyń jetekshisi Albına Jumasheva jáne eriktiler qatysty.
«Eriktilerdiń shilde aıyndaǵy jumysy mańyzdy ári qyzyqty ótti. Osy aıda bizdiń 510 múshemiz Astanadaǵy 96 nysanda 9 myń sheteldikke jáne 250-den astam delegasııaǵa qyzmet kórsetti», degen qalalyq shtab jumysyn úılestirýshi Tasqalı Taır eriktilerdiń atqarǵan jumystaryna arnalǵan beınetaspany kópshiliktiń nazaryna usyndy.
EKSPO-2017 halyqaralyq kórmesine kelýshilerge qyzmet kórsetýge atsalysqan eriktiler men sýpervaızerlerdi Astana qalasy ákimdigi men olar eńbek etip júrgen nysandardyń ókilderi marapattap, alǵystaryn bildirdi. «Nurly jol» nysanynyń eriktileri «Aıdyń eń úzdik komandasy» dep tanylsa, «Turan» ýnıversıtetiniń stýdenti Raýan Saǵyndyqov «Úzdik erikti» atanyp, sý jańa velosıpedke ıe boldy. Ol shtab týyn úshinshi maýsymnyń eriktilerine saltanatty túrde tabys etti. «Úzdik sýpervaızer» atanǵan EUÝ stýdenti Qumarbek Azat arnaıy kýbok pen Qurmet gramotasyn enshiledi.
Júnis OMAR, L.N.Gýmılev atyndaǵy Eýrazııa ulttyq ýnıversıtetiniń qyzmetkeri