Joba Elbasynyń elimizde sıfrly tehnologııalardy damytý týraly talabynyń aıasynda júzege asyrylýda. Osy maqsatpen Bas prokýratýranyń Quqyqtyq statıstıka jáne arnaıy esepke alý jónindegi komıtetimen bıýdjetten qosymsha shyǵynsyz «E-qylmystyq is» baǵdarlamasy ázirlendi.
Baǵdarlama qylmystyq prosestiń qylmystyń tirkelýinen bastap, onyń tergelýi jáne úkim oryndalǵanǵa deıin barlyq satysyn qamtıdy.
Bas prokýror Jaqyp Asanovtyń aıtýynsha, sıfrly tehnologııalarǵa kóshken jaǵdaıda, qoǵamnyń janyna batyp júrgen biraz problemalary sheshiledi. Olar ózdiginen joıylady. Sondyqtan osyǵan qatty mán berilip otyr.
Baǵdarlamanyń sapaly engizilýi maqsatynda joǵaryda atalǵan vedomstvolarmen birlesken buıryqqa qol qoıylyp, vedomstvoaralyq jumys toby quryldy.
Baǵdarlamany birinshi bolyp Astana jáne Jambyl oblysy, 10 qyrkúıekten bastap – Atyraý jáne Shyǵys Qazaqstan al 20 qyrkúıekten bastap Batys jáne Ońtústik Qazaqstan oblystary synaqtan ótkizedi.
Elektrondy qylmystyq istiń bereri ne?
a) qylmystyq isti burmalaý bolmaıdy, ister joǵalmaıdy; b) qajeti joq, artyq qaǵazdan qutylamyz; v) elektrondy formatqa kóshsek, ister tezirek tergelmek. Júıede 100 shaqty prosessýaldyq qujattyń shablony bolady. Sottan sanksııany elektrondy túrde alýǵa bolady; g) taldaý kúsheıedi. Árbir qylmystyq iske tereń úńilip, memleket boıynsha birkelki praktıka qalyptastyrýǵa múmkindik ashylmaq; d) jábirlenýshi, aıyptalýshy, advokat istiń qalaı tergelip jatqanyn kez kelgen ýaqytta onlaın rejimde kóre alady; j) elektrondy shaǵymdar modýli jumys isteı bastaıdy. Taraptar tergeýshiniń is-áreketine shaǵym keltirse, ony prokýror birden onlaın teksere alady.
Baǵdarlama bógde adamdardyń, sonyń ishinde júıeniń ákimshilerinen qylmystyq is materıaldaryna ruqsatsyz qol jetkizýinen qorǵaıdy. Istiń materıaldaryna tek isti júrgizetin tergeýshi jáne prokýror qol jetkize alady.
«Egemen-aqparat»