Plenerdiń maqsaty − táýelsiz elimizdiń salt-dástúrin, ádet-ǵurpyn, ǵasyrlardan syr shertken qasıetti sáýlettik eskertkishterin, tarıhı oryndar men ulttyq ónerdi nasıhattaý maqsatynda túrki tildes elderdiń eńbek sińirgen óner qaıratkerleri jəne talantty qylqalam sheberlerimen keskindeme salasy boıynsha ózara tájirıbe jáne pikir almasýdy júzege asyrý. Sonymen qatar, Ońtústik óńiriniń ózindik tabıǵı geografııalyq erekshelikteri men kóz tartarlyq oryndaryn beıneleıtin halyqaralyq deńgeıdegi óner shyǵarmalaryn jasaý, beıneleý ónerinde jańa kórkem baǵyttar jáne plastıkalyq sheshimder men formalardy izdestirý kózdeledi.
Plenerge 9 memlekettiń, ıaǵnı, Túrkııa, Túrikmenstan, О́zbekstan, Qyrǵyzstan, Reseı Federasııasy, Ýkraına, Bolgarııa, Moldava elderinen 17 sýretshi, al elimizdiń Astana, Almaty, Pavlodar, Shymkent qalalarynan 13 kásibı sýretshi óner professorlary shaqyrylǵan.
Jıynda sóz alǵan oblystyq mádenıet basqarmasynyń basshysy Nurbolat Ahmetjanov Memleket basshysynyń «Bolashaqqa baǵdar: rýhanı jańǵyrý» maqalasynda arnaıy toqtalǵan «Týǵan jer» baǵdarlamasyn júzege asyrýda búgingi otyrystyń máni erekshe ekendigin aıtty. Keń-baıtaq Qazaqstanda qylqalam sheberleriniń shabytyn shaqyratyn sulý tabıǵattan bólek túrki halqyna ortaq jádigerler kóp. Alqaqotan basqosýda TÚRKSOI halyqaralyq uıymynyń múshesi Sanjar Mulazymoglý osy jaǵyna basa toqtaldy.
Ońtústiktiń týmasy, bul jerdiń barlyq tarıhyn bes saýsaqtaı jaqsy biletin Sýretshiler odaǵynyń múshesi Seısenhan Mahanbetov kıeli oryndar men tabıǵat kórkemdigin sýretteý turǵysyndaǵy is-sharalardyń óz máninde ótetindigine senim bildirdi.
Dóńgelek ústel basynda aldaǵy jumystardy bir pysyqtap alǵan qylqalam sheberleri Túrkistan qalasyna jol tartty. Úsh kúndik jumys barysynda Otyrar aýdanyndaǵy Arystan bab kesenesi men tarıhı, mádenı eskertkishter jáne Han taǵy, Qarataý qoryǵy aýmaǵy, Báıdibek aýdanynyń Aqmeshit, Qostura aımaǵy men Qazyǵurt, Saıram-О́gem taý shatqaldary, Shymkent qalasynyń kórikti oryndarynda jumys istemek.
Olar mádenı shara aıasynda jumystaryn támamdaǵan soń Shymkentke oralyp, oblystyq beıneleý óneri mýzeıinde taǵy da bas qosady. Bul joly plener barysynda jasaǵan jumystar qorytyndylanady.
Baqtııar TAIJAN, «Egemen Qazaqstan»
Ońtústik Qazaqstan oblysy