– Brendan, Glazgoda ótken alǵashqy oıyn jaıly qandaı pikirdesiz? «Astananyń» dál osyndaı eseppen utylýyna ne sebep boldy dep oılaısyz?
– «Astana» úshin jaýap bere almaımyn. Alaıda, alǵashqy otyz mınýtta óte jaqsy oınaǵanyn bilemin. Birinshi goldy uzaqqa barmaı soǵyp alǵanymyz jaqsy boldy. Ary qaraı jumysymyz jeńildeı berdi. Al erteń múldem basqasha oıyn bolaıyn dep tur. Alǵashqy match ótkenniń enshisinde qaldy. Jaqsy nátıjege qol jetkizgenimiz jasyryn emes. Erteń bastaǵan isimizdi aıaqtaýymyz kerek. Top komandalardyń deńgeıinde óner kórsetý úshin bizge damý kerek. «Astana» óte jınaqy oınaıtyn ujymdardyń biri. Ásirese, qorǵanysta baryn salady. Sondaı-aq, shabýyl shebinde de bizge qıyndyq týdyratyn oıynshylardyń bar ekenin esten shyǵarmaǵanymyz jón.
– «Seltık» alǵashqy oıynmen salystyrǵanda ózgeshe oınaýy múmkin be?
– Biz árbir matchty joǵary deńgeıde oınaýymyz qajet.
– Glazgodaǵy nátıjeden keıin negizgi quramdaǵy oıynshylarǵa demalys beresiz be?
– Negiz quram jaıly match aldyndaǵy jattyǵýdan keıin talqylaıtyn bolamyz. Bizdiń aldymyzdaǵy basty mindet – ary qaraı ótý. Osy maqsatymyzǵa jetý úshin barlyǵyna daıyn bolýymyz kerek.
– «Seltık» osymen Qazaqstanǵa úshinshi ret keleıin dep tur. Biraq osyǵan deıin Astanada ótken bir de bir oıynda jeńiske jetpegen. Siz úshin jeńiske jetý qanshalyqty mańyzdy?
– Men «Seltık» qana emes «Atletıko», «Benfıka» sekildi úlken komandalardyń osynda kelip, jeńe almaı ketkenin bilemin. Astanada jeńiske jetý ońaı emestigin jaqsy bilemiz. Erteń biz burynǵydan da jaqsy oınaý úshin barymyzdy salamyz. Árıne, Shotlandııa men Qazaqstan arasyndaǵy ýaqyt aıyrmashylyǵy, stadıondaǵy sıntetıkalyq alańnyń keri áser eteri anyq.
– Eger erteńgi oıynda 0:4 esebimen utylyp qalsańyzdar ne bolmaq?
– Shynyn aıtsam, maǵan erteńgi oıynnyń nátıjesi mańyzdy emes. Qandaı eseppen utylsaq ta, Chempıondar lıgasynyń toptyq kezeńine joldama alsaq bolǵany. «Astana» óz jankúıerleriniń aldynda qanshalyqty jaqsy oınasa da, bes gol aıyrmashylyǵy olar úshin tym aýyr bolary sózsiz.
– «Astana» ótken jylǵa qaraǵanda deńgeıi tómendedi dep oılaısyz ba?
– Biz «Astanaǵa» asqan qurmetpen qaraımyz. Komanda eýroarenada úlken jetistikterge jetti. Astanalyqtar damyp keledi, ótken jylǵa qaraǵanda bir qadam alǵa jyljyǵany baıqalady. Biraq «Seltık» te bir orynda turyp qalǵan emes.
Aıta keteıik, Chempıondar lıgasynyń irikteý kezeńi aıasynda ótken matchta «Seltık» óz alańynda «Astanany» 5:0 esebimen jeńgen bolatyn.
Aıan ÁBDÝÁLI, «Egemen Qazaqstan»