– Erteń revansh alýymyz kerek. Birinshi matchtan keıin tıisti qorytyndy shyǵardyq dep oılaımyn. О́z alańymyzda oınaımyz, sondyqtan joǵary deńgeıde óner kórsetýimiz kerek. Keı oıynshylardyń jaraqaty men dıskvalıfıkasııasyna baılanysty azdaǵan qıyndyqtarymyz joq emes. Alǵashqy oıyndy qaperimizde ustap, maksımaldy deńgeıde oınaý úshin barymyzdy salamyz.
– Glazgodaǵy aýyr jeńilis komandaǵa qalaı áser etti?
– Negizi biz nashar oıyn kórsetken joqpyz. Biraq bir qyzyǵy «Seltıktiń» árbir tepken doby qaqpamyzǵa kire berdi. Bul jeńilis bizge aýyr soqqanyn jasyra almaımyn. Biraq tıisti nátıje shyǵaryp, ary qaraı jyljýymyz kerek. Qandaı qatelikke boı aldyrǵanymyzdy jaqsy bilemiz. Aldaǵy ýaqytta osy kemshilikterimizdiń ornyn toltyrsaq Eýropada jaqsy óner kórsetemiz dep oılaımyn.
– Marın Anıchıch ózin qalaı sezinip júr? Iýrıı Logvınenkonyń joqtyǵyna baılanysty ortalyq qorǵanysty retteýdi qalaı oılastyryp otyrsyz?
– Birinshi oıynda Marın múldem daıyn emes edi. Qazir óz qalpyna kelip jatyr. Match aldyndaǵy jaǵdaıy qandaı bolaryn kóremiz. Ol ortalyq qorǵanysta Evgenıı Postnıkovpen jıi oınaǵan. Úsh qorǵaýshymen de oınaýǵa bolady. Túrli joldaryn qarastyryp otyrmyz. Bárinen mańyzdysy jınaqy oınaýymyz kerek.
– Glazgodaǵy oıynnan keıin Aleksandr Mokın jaýapty oıynda alańǵa shyǵýy múmkin be?
– Men ylǵı da qaramaǵymda eki myqty qaqpashynyń baryn aıtyp kelemin. Mokın aıtarlyqtaı qatelikter jiberdi dep aıta almaımyn. Al Nenad Erıch Chempıondar lıgasynda áli oınamady. Sondyqtan bul joly qaqpany Nenadqa senip tapsyramyn.
– «Astananyń» «Seltıkten» áli de bolsyn ótý múmkin ekendigine senesiz be?
– Menińshe, «Seltık» Chempıondar lıgasynyń toptyq kezeńine 99 paıyz shyǵyp tur. Shyndyqqa týra qaraı bilý kerek.
Aıta keteıik, qos komanda arasyndaǵy jaýapty kezdesý búgin «Astana-Arena» stadıonynda saǵat 21:30-da bastalady.
Aıan ÁBDÝÁLI, «Egemen Qazaqstan»