Memleket basshysy Nursultan Nazarbaev EKSPO-nyń jabylý saltanatynda sóz sóılep, kórmeni qorytyndylady.
«EKSPO-2017 halyqaralyq kórmesiniń joǵary deńgeıde jáne zor tabyspen ótkenin maqtanyshpen aıtqym keledi, - dedi ol. – Táýelsiz Qazaqstannyń abyroıyn asqaqtatqan aıryqsha jetistikterdiń biri boldy. Elorda úsh aı boıy 115 el men 22 halyqaralyq uıymnyń basyn qosqan EKSPO shaǵyn qalashyǵyna aınaldy. Bul kórme Qazaqstannyń álemge tanymaldyǵy men týrısterdiń tanymyn arttyrdy. Elimizge kelgen mártebeli meımandarǵa halqymyzdyń qonajaılyǵyn kórsete aldyq. Biz bolashaqtyń energııasyna qatysty búkil álemnińǵ tájirıbesin óz jerimizde toǵystyrdyq.
Elbasy EKSPO-2017 kórmesin 4 mıllıonǵa jýyq adam aralap kórgenin tilge tıek etti. «Olardyń úshten eki bóligi – jastar men oqýshylar. Barshanyń nazaryn aýdarǵan ásem qalashyqqa kún saıyn qyryq-elý myń adam kelip turdy. Kórmeni 180 memleketten jarty mıllıon adam tamashalady, ıaǵnı árbir altynshy qonaq sheteldik ekenin atap ótkim keledi. EKSPO-nyń eń tanymal ortalyǵy – Qazaqstannyń pavılony – «Nur Álem» sferasyn búkil álem biletin boldy. Kórme bastalǵaly beri bul aımaqqa 1 mıllıon 300 myń adam kirip-shyqty. Dúnıejúzi kóz tikken EKSPO bedelimizdi bıiktetti, rýhymyzdy asqaqtatty.
«Kórmeniń sátti ótýine myńdaǵan adam atsalysty, eń aldymen Qazaqstan halqyna osy ıdeıany qoldaǵany úshin shyn rızashylyǵymdy bildiremin. Bul jerde EKSPO qurylysyna arhıtektorlar, ınjenerler, qurylysshylar, menedjerler, demeýshiler, seriktester atsalysty. Ásirese jas volonterler - 4500 jastarymyz qatysyp, osy jerde jumys istep, kóp sheteldikterge qalamyzdy kórsetti. Kóptegen memleketter, kompanııalar jáne halyqaralyq uıymdar da óz úlesterin qosty. Barshalaryńyzǵa aıtýly sharaǵa belsene qatysqandaryńyz úshin shyn júregimmen alǵys aıtamyn. Kórmeni basqarýdy tapsyrǵan kompanııaǵa, onyń basshysy Esimov myrzaǵa rızashylyǵymdy bildiremin. Búgingi saltanatqa kelip otyrǵan memleket jáne úkimet basshylaryna, Halyqaralyq kórme bıýrosyna jáne barlyq qonaqtarǵa erekshe rahmetimdi aıtqym keledi. Astana árqashan ózderińizdi ystyq yqylaspen, asa qurmetpenen qarsy alyp otyrady. Sizderge zor densaýlyq, mol tabys tileımin! Jasasyn Qazaqstan!», dep lebiz bildirdi Prezıdent.
Merekelik jabylý saltanaty «MýzART» tobynyń, Maıra Muhamedqyzy, Jámılá Serkebaeva, Lada Qysyqova qatarly estrada juldyzdarynyń qatysýymen konsertpen jalǵasty.
Ashat RAIQUL, "Egemen Qazaqstan"