Besqaraǵaı aýdanynda zamanynda jyr alyby Jambyldan bata alǵan, Muhtar Áýezovtiń joǵary baǵasyna ıe bolǵan, Isa Baızaqov, Nartaı Bekejanov, Tóleý Kóbdikov syndy dúldúldermen sóz qaǵystyrǵan daýylpaz aqyn Nurlybek Baımuratovtyń 130 jyldyq mereıtoıy joǵary deńgeıde atalyp ótti.
Eki kúnge sozylǵan mereıtoılyq sharalar 22 qyrkúıek kúni respýblıkalyq aqyndar aıtysynan bastalyp, bes saǵatqa jýyq ýaqytqa sozylǵan sóz saıysynyń bas júldesin Qytaı halyq respýblıkasynan kelgen Saıagúl Birlesbekqyzy ıelengen bolatyn. Bul týraly gazetimizdiń saıtynda jazǵan bolatynbyz. Al ekinshi kúngi mereıtoılyq sharalardyń shymyldyǵy aqyn dúnıege kelgen, eńbek etken Qaraǵaıly aýylyndaǵy tulǵa atyndaǵy mektepte «О́z dáýiriniń úni bolǵan aqyn» atty ǵylymı-tájirıbelik konferensııamen túrildi.
Taǵylymdy shara barysynda abaıtanýshy Asan Omarov, aýdandyq «Besqaraǵaı tynysy» gazetiniń bas redaktory Asylbek Qojahmetov pen aqynnyń kózin kórgen zamandastary taǵdyry talaıly tulǵa jaıynda estelikterin aıtty.
«Tamyrsyz dúnıe bolmaıdy. Bizdiń tamyrymyz Abaıda jatyr. Abaıdy bekerge aıtyp otyrǵan joqpyn. Nurlybek aqyn da Abaıdyń shákirtteriniń biri. Bul kisiniń aqıqat pen ádildikti jyrlaýy, qazaqty óner, bilimge shaqyrǵany, sharshamaı, talmaı jurttyń qamyn oılaǵany danyshpannyń shákirti ekendigin kórsetedi», - dedi Asan Omarov.
Konferensııa aıasynda «Nurlybek Baımuratov» atty jınaqtyń tusaýkeser rásimi ótip, aqyn týraly derekti fılm jurtshylyqtyń nazaryna usynyldy. Jastaıynan aqynnyń jyryn tyńdap ósken, 13 qursaq kótergen, «Altyn alqa» ıegeri Balkúmis Soltanbekqyzy Nurlybek Baımuratovqa arnaǵan tolǵaýyn da kópshilik jyly qabyldady. Konferensııadan keıin mereıtoıǵa kelgen qaýym mekteptegi aqyn murajaıyn aralap, bilim ordasy aldyndaǵy Nurlybek Baımuratov bıýstiniń ashylý saltanatyn tamashalady.
«Bıyl bizdiń aýdan úshin erekshe jyl boldy. О́ıtkeni, bıyl aýdanymyzdyń ǵana emes, oblysymyzdyń, elimizdiń maqtanyshy deýge turarlyq daýylpaz aqyn Nurlybek Baımuratovtyń 130 jyldyq mereıtoıy. Biz bıylǵy jyldy aýdanymyzda «Nurlybek Baımuratov jyly» dep jarııalap, qańtar aıynan bastap kóptegen is-sharalar ótkizdik. Osy rette aqyn esimi umytylýǵa shaq qalǵanda boztorǵaıdaı shyryldap 110 jyldyǵyn ótkizip, mektepke esimin bergizip, dara tulǵanyń dańqyn asyrǵan Ýálıhan Túkisov pen Toqtaǵan Kákenov aǵalarymyzǵa aýdan jurtshylyǵy atynan erekshe alǵysymdy bildirgim keledi. Dúldúl aqynnyń mereıtoıy qutty bolsyn», - dedi Besqaraǵaı aýdany ákiminiń mindetin atqarýshy Erbolat Rahmetýllın bıýstiń ashylý saltanatynda sóılegen sózinde.
Aqyn mereıtoıyna arnalǵan eki kúndik sharalar at báıgesimen túıindeldi.
Azamat QASYM,
«Egemen Qazaqstan»
Shyǵys Qazaqstan oblysy, Besqaraǵaı aýdany.
Sýretterdi túsirgen - avtor