Qarakózderimizdiń qatary sırek Glýbokoe aýdanynda túbi bir túrki jurtynyń áýezdi áýenderi eki jyl qatarynan áýeledi.
«Uly dala sazy» atty túrki halyqtarynyń aımaqtyq óner festıvaline bıyl О́skemen qalasynyń, Kúrshim, Tarbaǵataı, Ulan jáne Shemonaıha aýdandarynyń ónerpazdary qatysyp, tili uqsas, dini ortaq baýyrlas elderdiń qaıtalanbas ánderi men kúılerin, bılerin jurtshylyqqa pash etti. О́ner básekesine qatysýshylar «Vokal», «Horeografııa», «Aspaptyq áýen» atalymdary boıynsha baqtaryn synap, sybyzǵyny syzyltyp, dombyrany kúmbirletip, qobyzdy kúńirentip, kórermenderge ózgeshe kóńil-kúı syılady.
«Dombyranyń qońyr únine elitip, ónerpazdar oryndaǵan ənderdi qosyla shyrqaǵan kórermender Glýbokoe kentin án qanatynda terbep turǵandaı tamasha áser qaldyrdy. Osyndaı ádemi de áserli keshter jıirek ótkizilip tursa ǵoı», – deıdi qazylar alqasynyń tóraǵasy, oblystyq «Ertis konsert» mekemesiniń mýzykalyq prodıýseri Nursaǵıla Shámshıeva. Glýbokoe aýdanynyń ákimi Qalıhan Baıǵonysov ulttyq áýenderimizdi ulyqtaǵan bul shara Elbasynyń «Rýhanı jańǵyrý» baǵdarlamasy aıasynda uıymdastyrylyp otyrǵanyn, keleshekte óz jalǵasyn tabatynyn aıtady. Festıval qorytyndysynda Áset Naımanbaev atyndaǵy respýblıkalyq dástúrli án oryndaýshylar baıqaýynyń eki dúrkin júldegeri tarbaǵataılyq Tólegen Shákárimov «Aspaptyq áýen» atalymynda bas júldeni jeńip alsa, birinshi jáne ekinshi oryndardy sáıkesinshe ǵundar dáýirindegi kúı ańyzyn ulttyq mýzykalyq aspaptarmen tamasha jetkize bilgen tarbaǵataılyq «Babalar sazy» etno toby men atalǵan toptyń ánshisi Qanat Abýǵazın qanjyǵalaryna baılady.
Al osy atalymnyń úshinshi orynyn glýbokoelyq Eldar Qyzyrbekov ıelendi. Bıshiler saıysynda ózbek bıin naqyshyna keltire oryndaǵan kúrshimdik Inabat Baqytqanova bas júldege laıyq dep tanyldy. «Vokal» atalymynda respýblıkalyq áskerı qyzmetkerler arasynda ótken baıqaýdyń laýreaty, «Oralhannyń kóktemi» atty halyqaralyq án festıvaliniń dıplomanty ulandyq Baqyt Qydyrhanova úshinshi oryndy enshiledi. Glýbokoelyq qos ánshi Iýlııa Iýrochkına men Álınur Sultanǵazın birinshi jáne ekinshi oryndardy ıelendi. Halyqaralyq, respýblıkalyq, oblystyq jáne qalalyq vokaldyq baıqaýlardyń laýreaty atanyp júrgen shemonaıhalyq ónerpaz Andreı Medvedev Gran-prıdi jeńip aldy.
Azamat QASYM,
«Egemen Qazaqstan»
Shyǵys Qazaqstan oblysy, Glýbokoe aýdany