Is-sharaǵa «Atameken» UKP basqarma tóraǵasy Abylaı Myrzahmetov, onyń orynbasary Rýstam Júrsinov, sondaı-aq departamentterdiń birqatar dırektorlary qatysty. Sot júıesinen Joǵarǵy sottyń azamattyq ister jónindegi sot alqasynyń tóraǵasy Elis Ábdiqadyrov, Joǵary sot organynyń sýdıalary, Joǵarǵy sot janyndaǵy Sottardyń qyzmetin qamtamasyz etý departamentiniń basshylyǵy qatysyp otyrdy, dep habarlady Joǵarǵy sottyń baspasóz qyzmeti.
Kezdesýdiń maqsaty – Qazaqstanda bıznes ortany jaqsartý boıynsha aǵymdaǵy máselelerdi talqylaý.
E.Ábdiqadyrov kezdesýdi asha kele, kásipkerlik halyqtyń ál-aýqatynyń negizi, sondaı-aq memleketimizdiń strategııalyq josparlaryn iske asyrýdyń birden-bir kepili ekendigin atap ótti. Sońǵy jyldary Ult jospary sheńberinde júrgizilgen reformalar elimizdiń sot júıesin álemdegi eń qoljetimdi ári jedel sot ádildigi etýge múmkindik berdi. Dúnıejúzilik banktiń bıznesti júrgizý reıtıngisinde Qazaqstannyń sot júıesi sońǵy eki jyl qatarynan álemdegi alǵashqy on eldiń qataryna kirdi.
Buǵan qosa, kásipkerler tarapynan sottyń qyzmetine sýbektıvti baǵa berýimen baılanysty birqatar problemalyq máseleler bar. Bul óńirlerde aıryqsha baıqalýda. Muny júrgizilgen saýaldama qorytyndysynan, sonyń ishinde halyqaralyq qurylymdar júrgizgen saýaldamadan baıqaýǵa bolady.
Osyǵan baılanysty, E.Ábdiqadyrov Joǵarǵy sottyń «Atameken» UKP-men bıznesti sotta qorǵaý máseleleri boıynsha ózara is-qımylyn kúsheıtý qajettigin atap ótti. О́ńirlerde bıznes ortany quqyqtyq aǵartý, sonyń ishinde sot bıliginiń táýelsizdigin qamtamasyz etý men sot qyzmetin ınstıtýttyq baǵalaý máselelerine basa nazar aýdarý qajet. Búginde bul respýblıkanyń, sonyń ishinde ınvestısııany qorǵaý men ekonomıkany damytý sııaqty parametrler boıynsha barlyq salasyn damytýda ishki jáne halyqaralyq oń monıtorıng úshin erekshe mańyzy bar.
Osy rette birlesken jumysty kúsheıtý úshin 2014 jyly «Atameken» UKP-men Joǵarǵy sot apparaty qol qoıǵan Yntymaqtastyq týraly memorandýmnyń mańyzy zor. Buǵan qosa, Qazaqstannyń reıtıngtik kórsetkishteri, zańnamany jetildirý, korporatıvtik daýlarǵa qatysty sot praktıkasyn túsindirý boıynsha birlesken mobıldik toptar qurý usynyldy. Sottar «Atameken Business Channel» arnasy arqyly túsindirý jumysyna belsene aralasýǵa ázir. Bıznes ortanyń kóńil-kúıi men olardyń sottar jumysyn qabyldaý deńgeıin zertteý úshin táýelsiz áleýmettik saýaldama júrgizý usynyldy.
Kezdesý sheńberinde Joǵarǵy sottyń departament basshysy Nurserik Sháripov UKP ókilderine «Sot kabıneti», «Sot aktileriniń jańa banki» jáne taǵy basqa servısterge basymdyq bere otyryp, elektrondy sot ádildiginiń múmkindikterin tanystyrdy.
Taraptar talqylanǵan barlyq máseleler boıynsha qyzý pikir almasty. Kezdesý sońynda Joǵarǵy sot pen «Atameken» UKP ókilderi birlesken jumysty kúsheıtý qajettiligin atap ótti.