Sochıde ótken TMD-ǵa múshe memleketter basshylarynyń keńesinde Dostastyq jumysyn reformalap, onyń qyzmetin jetildirý jóninde sóz boldy.
Birlestik qurylǵaly beri Qazaqstan onyń quramynda belsendi áreket etip, ekonomıkalyq ıntegrasııalyq ýaǵdalastyqty árdaıym qoldap otyrdy. Prezıdent Nursultan Nazarbaev ishki baılanysty tereńdetetin naǵyz ıntegrasııalyq baılanys ornatýdyń qajettiligin aıtyp keledi.
Qazaqstan tarapy TMD qyzmetiniń qazirgi ýaqytqa saı kelmeıtini týraly jıi másele kóterýde. Máselen, Dostastyq aıasynda qabyldanǵan qujattardyń birqatary qaıta qaraýdy qajet etedi. Ýaǵdalasqan maqsattyń oryndalý barysynda kedergilerdiń kezdesýi keń kólemdi yntymaqtastyq qurýdyń kerektigin kórsetti. Osyǵan sáıkes, Kedendik odaq jáne Eýrazııalyq ekonomıkalyq odaq quryldy.
Alǵashqyda TMD ıntegrasııalaý quraly retinde ǵana emes, Keńes Odaǵynyń ornyn basqan memleketterdiń ózara qarym-qatynasyn úzip almaý maqsatynda quryldy. Sol kezde mundaı uıym qurý óte qajet edi. Keıinirek ár el óziniń damý baǵytyn ustanyp, biri Shyǵysqa, biri Batysqa qarap bet túzeı bastady. Kelesileri, tipti, óz qazanynda ózi qaınaýdy jón sanady.
TMD áli kúnge deıin týyn túsirgen joq jáne onyń aıasynda qabyldanǵan qujattar da óz qalpynda. Áıtse de, keı qujattar Eýrazııalyq ekonomıkalyq odaqqa múshe memleketter qabyldaǵan sheshimderge saı kele bermeıdi. Sondyqtan TMD qyzmetin retteý máselesi, normatıvti negizderin qaıta qarap, qazirgi ýaqytqa saı etý qajet ekeni anyq. Menińshe, uıymdy reformalaý osy baǵytta júrgiziledi.
Vıacheslav DODONOV, Qazaqstan Strategııalyq zertteýler ınstıtýtynyń bas ǵylymı qyzmetkeri, ekonomıka ǵylymdarynyń doktory