"Rýhanı jańǵyrý" baǵdarlamasy jáne óńirlik "Taza aımaq" baǵdarlamasy aıasynda Kaspıı teńizi jaǵalaýyn túrli qoqystardan tazartý maqsatynda, halyq aýzynda "Golýbaıa býhta" atanyp ketken jerde ekologııalyq senbilik ótti dep habarlaıdy, óńirlik kommýnıkasııalar qyzmetiniń baspasóz qyzmeti.
"Kúzgi tazalaý" atty senbilik jumystary "Eko Mańǵystaý" úkimettik emes uıymynyń bastamasymen uıymdastyrylyp, sharanyń ótýine Túpqaraǵan jáne Mańǵystaý oblysynyń ákimdigi qoldaý kórsetti. Senbiliktiń negizgi maqsaty - kúndelikti ekologııalyq mádenıetti qalyptastyrý boıynsha kúsh-jigerdi biriktirý, turǵyndar nazaryn qorshaǵan ortany qorǵaý máselelerine aýdarý jáne ekologııalyq ahýaldy jaqsartý. Tazalyq sharasyna kez-kelgen adam qatysýǵa múmkindik aldy.
"Eko Mańǵystaý" úkimettik emes uıymynyń dırektory Kırıll Osınnyń aıtýynsha, senbilikke eń belsendi qatysqandar - Mańǵystaý oblysy óńirlik kommýnıkasııalar qyzmeti, "Qoǵamdyq kelisim" kommýnaldyq uıymy, oblystyq prokýratýra, Mańǵystaý týrızm kolledji, "ADVER" kompanııasy jáne tabıǵatqa janashyr turǵyndar boldy.
"Golýbaıa býhta" Túpqaraǵan aýdanyna bara jatqan joldyń 63 shaqyrymynan burylǵan aýmaqta ornalasqan, al senbilikke qatysýshylar bolsa avtobýstarmen jetkizildi. Tazalyq saqshylary barlyq qajetti qural-saımandarmen qamtamasyz etildi. Teńiz jaǵalaýy plastıkalyq, shyny jáne basqa da qoqystardan tazartyldy. Senbiliktiń qorytyndysy boıynsha barlyǵy 200-den astam qapshyq, barlyǵy 1 tonnadan astam qoqys jınalǵan.
- Kaspıı teńizi jaǵalaýyn jınalyp qalǵan qoqystan tazartý jumystary turaqty túrde júrgiziledi. Máselen, "Golýbaıa býhta" aýmaǵynda ekologııalyq desant osydan 4 aı buryn bolǵan edi. Qarap otyrsaq aıtarlyqtaı kóp ýaqyt ótken joq. Mundaǵy jaǵdaıdy kórip, kóńil-kúıimiz túsip ketti. Qalaısha týǵan ólkege degen osyndaı jaýapsyzdyqpen qaraýǵa bolady? Bul jaǵdaıdan keıin adamdaryń ózderine degen qurmetiniń joq bolǵany ma degen oıǵa qalady ekensiń. Onyń ústine aımaqta týrızmdi damytqymyz keledi. Mundaı kórinisten keıin týrızm týraly aıtýdyń ózi artyq. Osyndaı demalys oryndaryna kelýshiler qatary kóp ekendigi sózsiz, biraq olar qarapaıym tazalyq erejelerin saqtamaıtyny kóńilge qaıaý túsiredi", - deıdi K.Osın.
Elbasy N.Nazarbaevtyń "Bolashaqqa baǵdar: rýhanı jańǵyrý" baǵdarlamasy aıasynda "Sakraldy Qazaqstan" jobasy júzege asyrylýda. Onyń aıasynda ekologııalyq ahýaldy jaqsartý men eldi mekenderdi abattandyrý jumystary júrgizilýde. Mańǵystaýlyqtar atalmysh jobany júzege asyrýǵa belsendi kirisip ketti, delingen baspasóz habarlamasynda.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.