Táýelsizdiktiń negizgi tiregi – ulttyq qaýipsizdikti qamtamasyz etý bolyp tabylady. Elimizdiń qaýipsizdik salasyndaǵy basty basymdyqtaryn aıqyndaǵan Elbasy N. Nazarbaevtyń: «Bostandyq pen táýelsizdikti jeńip alý jetkiliksiz, ony tabandy túrde qorǵap, nyǵaıtyp, urpaqtarǵa qaldyrý qajet. Bizdiń urpaq eńsere almaı, ózderine qaldyrǵan aýyrtpalyqtar men qıynshylyqtar úshin bolashaq urpaq keshirer. Eger biz óz memlekettiligimizden aıyrylyp, egemendigimizdiń strategııalyq negizderin, óz jerlerimiz ben resýrstarymyzdy qolymyzdan shyǵaryp alsaq, bizge keshirim joq. Sondyqtan da ulttyq qaýipsizdik elimizdiń birinshi strategııalyq basymdyǵy bolýǵa tıis», degen ulaǵatty sózin árbir qazaqstandyq ómirdegi basty ustanymdaryna aınaldyra bilgeni jón dep oılaımyn.
Búgingi tańda Memleket basshysynyń salmaqty da salıqaly saıasatynyń arqasynda ulttyq qaýipsizdikke, elimizdegi qoǵamdyq tártipke, ishki tynyshtyǵymyzǵa nuqsan keltirer zalaldardyń respýblıka aýmaǵynda paıda bolýyna aıtarlyqtaı alǵysharttar joq. Desek te, qazirgi zamanǵy barlyq qaýip-qaterlerdiń adamzat balasyna ortaq ekendigine eshkim talasa almaıdy. Ol bir adamnyń nemese bir memlekettiń ǵana basyna tónip turmaǵandyǵyn dúnıejúzilik qoǵamdastyq, álem jurtshylyǵy moıyndady. Tipti barlyq jaǵynan damyǵan órkenıetti elderdiń ózi qaýip-qaterdiń biri bolyp sanalatyn halyqaralyq lańkestiktiń aldynda ózderiniń dármensizdikterin kórsetti. Mundaı máselelerdi qashanda tynymsyz izdenis, kúsh biriktirý, bir mámilege kelý sekildi parasatty qadamdar ǵana sheshe alary sózsiz. Elbasy N.Nazarbaev bul jóninde: «Bizdiń zamanymyzdyń ereksheligi terrorızmge qarsy belsendi kúres bolyp otyr. Álemde terrorshylardyń aıýandyq áreketterinen qorǵalǵan, sirá, birde-bir memleket joq. Onda eshbir kinásiz beıbit azamattar qaza tabýda. Halyqaralyq terrorızmge, dinı ekstremızmge, esirtki tasymaly men basqa da qaýip-qaterge qarsy kúreste biz úshin óńirlik jáne halyqaralyq kúsh-jigerlerdi shoǵyrlandyrý asa mańyzdy», dep búkil adamzat qoǵamyna qater tóndirip otyrǵan búgingi kúnniń ótkir máselelerin barlyq beıbitshilik súıgish eldermen birlese sheshýi qajettigin alǵa tartqan bolatyn.
Sońǵy ýaqyttary elimizde túrli dinı aǵymdardyń jańbyrdan keıingi sańyraýqulaqtaı qaptap ketkeni jasyryn emes. Iegova kýágerleri, «Hızb-ýt-Tahrır» dinı-ekstremıstik uıymy, saentologııa, krıshna jáne taǵy basqa da ekstremıstik toptar jegi qurttaı eldiń ishine iritki salyp, ata dástúr, salt-senimnen adastyrýǵa kún-tún demeı damylsyz kúsh jumsaýǵa bar. Dinı iritki salýshylardyń arqasynda qoǵamdy dúrliktirgen oqıǵalar da az boı kórsetip otyrǵan. Áriden qozǵamaı-aq, ótken jyly maýsymda Aqtóbe qalasynda oryn alǵan qandy oqıǵa soǵan naqty dálel bolady.
Endigi kezekte elimizdiń din salasyndaǵy saıasatyna, jastarymyzdyń dinı kózqarasy jónindegi tárbıesine beıjaılyqpen qaraýǵa múlde bolmaıdy. О́ıtkeni qazirgi qoǵam qaýipsizdiginiń asa mańyzdy tarmaǵy ol – dinı tárbıe. Sondyqtan saqtyq sharalaryna el bolyp qamdana bilgenimiz jón ári oǵan qoǵamnyń barsha ınstıtýty onyń menshiktik nysanyna qaramastan atsalysýy tıis. Ol úshin barsha adamzatty súıýge, ımandylyq pen adamgershilikke baýlıtyn qasterli ıslam dininiń qundylyqtaryn jastarymyzǵa júıeli túrde nasıhattap, qaterli dinı-separatıstik uıymdardyń qoǵamdaǵy astyrtyn saıasatynyń ara-jigin ashyp túsindirgenimiz jón. Ulttyq ulan sapynda bul máselege jiti nazar aýdarylyp, dinı ekstremızmniń paıda bolýy, onyń adamdy adastyrýshylyqtaǵy ádis-tásilderi men tetikterin saralap, odan saqtaný jaıly tolyqqandy tárbıe berilip keledi. Endigi kezekte bul dinı tárbıe jumystary mektepten bastap barlyq qoǵamdyq mekemelerde atqarylsa quba-qup. Sonda ǵana tórt qubylamyz túgendeleri sózsiz demekpin.
Sabyrjan SÚLEIMENOV, polkovnık, Ulttyq ulannyń «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary
Almaty