ÝEFA Eýropa lıgasy toptyq kezeńiniń 4-týr aıasynda «Astana» komandasyn qabyldaıtyn «Makkabı» jasyl alańda bar kúsh-jigerlerin salady. Bul týraly komandasynyń bas jattyqtyrýshysy Iordı Kroıf match aldynda baspasóz máslıhatynda aıtty.
– Biz mindetti túrde jeńiske jetýimiz kerek. Meniń komandam oıynǵa daıyn. Biz Qazaqstanda deńgeıimizdi tolyq kórsete almadyq. Biraq erteń kezdesý basqasha jaǵdaıda órbıdi. Ketken eseni qaıtarýǵa múmkindigimiz tolyq jetedi.
– Eki apta buryn «Makkabı» «Astanadan» 0:4 esebimen jeńilýiniń sebebin nemen túsindiresiz?
– Qazaqstanda ótken oıynda «Astana» shabýylshylary qorǵaýshylarymyzdy ábden ábigerge túsirdi. Bolmashy goldardy jiberip aldyq. Biraq, erteń ondaı problema bolmaıtynyna senimdimin.
– Iri jeńilisten keıin, alańǵa shyǵý qanshalyqty qıyn?
– Shyny kerek, biz Qazaqstanda jeńilemiz dep oılaǵan joqpyz. Sebebi, ótken jyly ǵana bizde kelesi kezeńge ótýge tolyq múmkindigimiz boldy. Búginde sol mejege jetýge talpynýdamyz. Áıtkenmen, bizdiń topta kileń myqtylar jınalǵan. Soǵan qaramastan aldymyzǵa úlken maqsat qoıyp otyrmyz.
– Erteń jeńiliske ushyrasańyzdar, sizder úshin nokaýt bolma ma?
– Sol úshin jeńiske jetýimiz kerek. Jigitter ony jaqsy túsinedi.
– «Astananyń» artyqshylyǵy nede dep oılaısyz?
– «Astananyń» tájirıbeli oıynshylary bar. Onyń ústine qarsylas komanda jasandy alańǵa ábden mashyqtanyp alǵan. Ketken kemshilikter osy joly qaıtalanbas úshin jumys jasadyq. Erteń – sonyń jemisin kóretin kez.
Esterińizge sala keteıik, 2 qarashada Netanııa qalasynda ÝEFA Eýropa lıgasy toptyq kezeńiniń 4-týr aıasynda «Makkabı» men «Astana» komandalary jasyl alańǵa shyǵady.
Almas MANAP, «Egemen Qazaqstan» – Netanııadan (Izraıl)