Ultaralyq tatýlyq pen rýhanı kelisim – barsha qazaqstandyqtardyń tilegi. Osyndaı asyl murattardy maqsat etken jıyn Qyzyljar aýdanynda ótti.
«Rýhanı jańǵyrýdyń negizi – qoǵamdyq sanany damytý» taqyrybyna arnalǵan semınardy kirispe sózben ashqan Qyzyljar aýdanynyń ákimi Bolat Jumabekov jergilikti jerlerde 11 dinı birlestik, 10 etnomádenı uıym jumys isteıtinin, onyń aıasynda adamgershilik, toleranttylyq, ózara túsinýshilik sekildi asyl qasıetterdi nasıhattaýǵa negizdelgen sharalar júıeli júrgiziletinin, yntymaqtastyq, aýyzbirlik basty qymbat qazynamyz, ulttyq qundylyǵymyz bolyp tabylatynyn jetkizdi.
«Elimizde túrli etnos ókilderi tiline, dinine, mádenıetine qaramastan tatý-tátti ómir súrip keledi. Elbasynyń konfessııaaralyq kelisim men dinı tózimdilikti nyǵaıtý baǵytyndaǵy talaptaryn oryndaý – bárimizdiń abyroıly mindetimiz», dedi Bolat Serikuly.
Alqaly basqosýda «Qyzyljar» ortalyq meshitiniń naıb-ımamy Qasymhan Abdollauly, Rım-katolık shirkeýiniń prıhody Tomash Iаkýbchak, oblystyq «Qoǵamdyq kelisim» mekemesiniń basshysy Ásemgúl Esqoja, ishki ister departamenti ekstremızm men terrorızmge qarsy kúres basqarmasynyń jetekshisi Rýslan Muhamedjanov, taǵy basqalary qazaqstandyqtar bir-birine degen meıirim, syılastyq mahabbatyn is júzinde kórsetip kele jatqanyn, munyń ózi jas býyn úshin úlken tárbıe mektebine aınalǵanyn, sondyqtan urpaqtar arasyndaǵy izgilik sabaqtastyǵyn odan ári órkendetýdiń qadamdaryn júıeli qarastyrý, bul oraıda, qalyptasqan tájirıbelerge súıenýdiń mańyzdylyǵyn atap kórsetti. Sonda ǵana tatýlyǵymyzǵa kóleńke túspeıdi, eldiń bolashaǵy baıandy bolady, erteńgi kúnge degen senimdilik arta túsedi, desti.
Sóıleýshilerdiń qaı-qaısysy bolsyn dinı birlestikter, etnomádenı uıymdar men memlekettik organdar arasyndaǵy úılesimdilikke nazar aýdaryp, konfessııaaralyq, dinaralyq tatýlyqty odan ári damytýdyń joldaryn atap kórsetti. 1992 jyldan beri turaqty túrde atalyp kele jatqan rýhanı kelisim kúniniń mańyzdylyǵyna toqtalyp, taǵattylyqqa úndeıtin, turǵyndardy ortaq maqsat jolyna toptastyratyn qaıyrymdylyq aksııalaryn jıi ótkizip turýǵa kelisti.
О́mir ESQALI,
«Egemen Qazaqstan»
Soltústik Qazaqstan oblysy,
Qyzyljar aýdany