Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda «Qazaq «Týǵan jerge týyńdy tik» dep beker aıtpaǵan. Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady...
Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis», dep atap kórsetken bolatyn.
Elbasy aıtqandaı, patrıotızmniń eń jaqsy úlgisi árbir aýylda esimderi el esinde saqtalǵan, júreginiń túbinen oryn alatyn birtýar perzentteri bar. Bizdiń aıtqaly otyrǵan keıipkerlerimiz de sol qatardan. Olar – Alǵabas aýylynyń ardager ustazdary, ustazdardyń «ustazy» bolǵan Baıǵabyl Smaılov pen Jalǵas Sıdaǵalıev edi. Bul ustazdardyń aýylymyzdyń oqý-tárbıe isin órkendetý barysyndaǵy qajymas eńbekteri elenip, ózderi turǵan kóshelerine aýyl turǵyndarynyń ystyq yqylasymen esimderi berilgen bolatyn. Alǵabas orta mektebiniń (Kırov orta mektebi) dırektory bolǵan Baıǵabyl Smaılovtyń esimi, óziniń kózi tirisinde 70-jyldardyń aıaǵynda aýdanymyzdyń áıgili murajaıynan oryn tepken edi. Al 42 jyl bastaýysh synyp muǵalimi bolǵan Jalǵas Sıdaǵalıevten aýyl aqsaqaldarynan bastap, nemerelerine deıin aýyl turǵynynyń 85%-y bilim aldy desek, artyq aıtqandyq emes.
Aqjaıyq aýdany Alǵabas aýylynyń ákimi Temirbolat Qaıratulynyń qoldaýymen aýylda «Rýhanı jańǵyrý» belgisiz sebeptermen osy atalǵan ardager ustazdar atyndaǵy kósheniń atyn ózgertýden bastaldy. Bul áreket aýyl turǵyndaryna ǵana emes, elimizdiń túkpir-túkpirinde qyzmet etken nemese zeınetkerlikke shyqqan talaı janǵa ózine oı saldy. Birneshe urpaqtyń sanasyna sáýle sepken ustazdar arýaǵynyń áldekimderdiń aldynda ne jazyǵy bolǵany bizge túsiniksiz. Aýylda olardan basqa da eńbegi men erligi elengen tulǵalardyń kóshege esimderi berilgenin atap ketkimiz keldi. Sol aýyl perzentteriniń ishinde etigimen qan keshken keshegi surapyl soǵystaǵy Keńes Odaǵynyń Batyry Esen Shegreıuly Oraqbaev ta bar. Onyń da esimine kúmán týdyryp, aýdanymyzdyń qaıbir sheneýnikteri men aýyl ákim-qaralarynyń Oraqbaev esimin birjola joıýǵa atsalysqany da kóńilimizge qaıaý túsirip, qabyrǵamyzǵa batty. Bul rýhanı jańǵyrý ma, álde rýhanı azǵyndalý ma? Ara-jigin oblys basshylary aıqyndap beredi degen úmittemiz. «Rýhanı jańǵyrýdy» syltaý etip, kóshe attaryn ózgertýge bola ma?
Qaısar JALǴASULY, Alǵabas orta mektebi fızıka jáne ınformatıka pániniń muǵalimi
Batys Qazaqstan oblysy, Aqjaıyq aýdany