Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysy barysynda memlekettik-jekeshelik áriptestik jobalaryn iske asyrý barysy, sondaı-aq «Baǵdarlamalyq MJÁ» engizýdiń perspektıvaly salalary qaraldy. Bul týraly primeminister.kz habarlady.
Ulttyq ekonomıka mınıstri Tımýr Súleımenov jalpy 139,5 mlrd teńge somaǵa 116 MJÁ kelisimsharty jasalǵanyn baıandady. 70 mlrd teńge somaǵa 53 nysan paıdalanýǵa berildi, 69,5 mlrd teńge somaǵa taǵy 63 nysan salynyp jatyr. Olardyń ishinde 45 bilim berý nysany, 27 densaýlyq saqtaý, 17 mádenıet jáne sport nysany, 7 servıstik-daıyndaý ortalyǵy, «aqyldy qala», energetıka jáne jolaýshylar tasymaldary salasyndaǵy 3 respýblıkalyq joba bar.
Jasalǵan kelisimsharttar sany boıynsha kóshbasshylar Qaraǵandy, Qostanaı jáne Ońtústik Qazaqstan oblystary. Oǵan qosa, ınvestısııalar kólemi boıynsha (jobalardyń quny boıynsha) kóshbasshylar Aqtóbe oblysy jáne Astana qalasy bolyp tabylady.
Qosymsha, memlekettik organdardyń esepterine sáıkes, daıyndyqtyń túrli kezeńderinde jalpy 1,7 trln teńge somaǵa taǵy 431 joba bar. Olardyń ishinde respýblıkalyq deńgeıdegi 15 joba pysyqtalýda, jergilikti deńgeıde 760,6 mlrd teńgege 416 óńirlik joba daıyndalyp jatyr.