Elbasy Nursultan Nazarbaevtyń «Rýhanı jańǵyrý» baǵdarlamalyq maqalasyna oraı Abaıdyń tarıhı memlekettik qoryq-mýzeı úıiniń ujymy «Adamzattyń Abaıy» kórmesimen Aqtóbe óńirlik memlekettik ýnıversıtetinde boldy.
Sapar barysynda «Abaıtaný» ǵylymı-zertteý ortalyǵynyń saltanatty túrde ashylýyna qatysty. Sharany ýnıversıtet rektory, fılologııa ǵylymdarynyń doktory, professor Baýyrjan Erdembekov quttyqtaý sózimen ashty. Saltanatty sharaǵa jınalǵandar «Adamzattyń Abaıy» kórmesin tamashalap, jádigerlerge qyzyǵýshylyqtaryn tanytty.
- «Abaıtaný» ǵylymı-zertteý ortalyǵynyń ashylýyna Abaı mýzeıi ózindik úlesin qosyp otyr,-dedi mýzeı dırektory Bolat Júnisbekov,-máselen, ortalyqqa mýzeı qoryndaǵy qundy materıaldar, derekter, fotosýretter, estelikterdiń kóshirmeleri tabystalyp, ár jyldary shyqqan «Abaı» jýrnalynyń sandary men mýzeıdiń baspa ónimderin de syıǵa tarttyq. «Adamzattyń Abaıy» kórmesiniń maqsaty-ǵalamdyq tulǵa Abaı Qunanbaıulynyń ómiri men shyǵarmashylyǵyn keńinen nasıhattaý jáne aqynnyń qoly tıgen qundy jádigerlermen halyqty etene tanystyrý bolyp tabylady. Adamzatty súıýge shaqyrǵan aqyn jyrlary, qara sózderi jáne onyń tutynǵan zattary qaı zamanda da mańyzdylyǵyn joǵaltpaq emes.
Budan keıin Abaıdyń memlekettik qoryq-mýzeıiniń ujymy «Adamzattyń Abaıy» kórmesimen Atyraý qalasyna atbasyn burdy. Osynda ótken «Abaı keshi» qaıyrymdylyq sharasyna belsene atsalysty. Keshti uıymdastyrýshy – «Qoǵamdyq senim» qory eken.
Qaıyrymdylyq keshte danyshpan aqynnyń «Kózimniń qarasy», «Aıttym sálem qalamqas», «Jelsiz túnde jaryq aı» ánderi oryndalyp, «О́lsem, ornym qara jer syz bolmaı ma?», «Jarq etpes qara kóńilim ne qylsa da» óleńderi oqyldy. Atyraýlyqtar Abaıdyń 1885 jyly Semeıdegi ólketaný mýzeıine tapsyrǵan qundy jádigerlerin kózben kórip, erekshe rıza boldy. Sóıtip «Abaı keshinen» jınalǵan qarajat qaladaǵy áleýmettik deńgeıi tómen otbasylaryna jáne jetimder úıine tapsyryldy. Shara sońynda, «Qoǵamdyq senim» qory «Abaı keshin» qoldap, aıryqsha atsalysqany úshin Abaı mýzeıiniń ujymyna alǵys hat tabystady.
Raýshan Nuǵmanbek,
«Egemen Qazaqstan»
Atyraý-Aqtóbe-Semeı