Qazaqstan, Túrikmenstan jáne О́zbekstannyń syrtqy ister mınıstrleri úsh memlekettiń shekaralarynyń túıisý núktesi týraly kelisimshartqa qol qoıdy, dep habarlaıdy QazAqparat.
Oǵan QR Syrtqy ister mınıstri Qaırat Abdrahmanov, mınıstrler kabıneti tóraǵasynyń orynbasary - Túrikmenstan syrtqy ister mınıstri Rashıd Meredov jáne О́zbekstan syrtqy ister mınıstri Abdýlazız Kamılov qatysty.
Túıisý núkteleri týraly kelisimshartqa qol qoıý Qazaqstan, Túrikmenstan jáne О́zbekstan arasyndaǵy memlekettik shekaranyń halyqaralyq-quqyqtyq rásimdeý kezeńderiniń birin tolyqtaı aıaqtaýǵa, ózara syılastyqty, egemendik teńdikti jáne úsh shekaralas memlekettiń terrıtorııalyq tutastyǵyn nyǵaıtýǵa myqty tireý bolady.
«Qazaqstan Prezıdenti Nursultan Nazarbaev táýelsizdik alǵan alǵashqy kúnnen bastap memlekettik shekarany bekitý máselesine basa nazar aýdardy. Bul jaýapty memlekettik qurylystyń jáne el qaýipsizdigi máselesi. Búgin qol qoıylǵan úshjaqty kelisim úsh memlkettiń shekarasyn quqyqtyq rásimdeýge núkte qoıatyndyqtan, Ortalyq Azııa úshin tarıhı jaǵdaı», - dedi Qazaqstan syrtqy ister mınıstri Qaırat Abdrahmanov qol qoıý rásiminen keıin.