Syrdarııa aýdanynda Qurmetti azamattar Alleıasy, tarıhı-ólketaný mýzeıi, shaǵyn jáne orta kásipkerlik nysandary paıdalanýǵa berildi.
Qyzylorda oblysynyń ákimi Qyrymbek Kósherbaev Syrdarııa aýdanynda bolyp, nysandardyń ashylýyna qatysty.
Aımaq basshysy aldymen Syrdarııa aýdany, Aqjarma eldi mekeninde shaǵyn jáne orta káspkerlikti damytý jumystarynyń nátıjesinde ashylǵan "Tolǵanaı" kesheninde boldy. 80 adamǵa laıyqtalǵan dúken men dámhanany jeke kásipker Nursulý Dúısenova ashyp, jumysyn dóńgeletip otyr.
Al Tereńózek kentinen ashylǵan Qurmetti azamattar alleıasynda aýdan damýyna eleýli úles qosqan 99 azamattyń esimi jazylǵan arnaıy taqtaıshalar ornatylǵan.
Sonymen qatar, aýdandyq "Eńbek dańqy mýzeıi" tarıhı-ólketaný mýzeıiniń jumysy da jandana túsken.
«Syr eli – el azamattaryn birkisideı eńbekke jumyldyra bilgen qyzylordalyq 102 Sosıalıstik Eńbek Eri shyqqan qasıetti ólke. Olardyń esimderi oblys tarıhynda altyn áriptermen máńgilikke jazylady. Ataqty kúrishshi Ybyraı Jaqaevpen ıyq tirestire eńbek etip, memleket baılyǵyn eselep ósirgen aımaǵymyzdan shyqqan Eńbek Erleri Kúlánda Ábdiramanova, Qasym Bódeev, Ibadýlla Aqnııazov, shirkeılilik Baldyrǵan Mustapaeva jáne basqa da aǵa-apalarymyz elimizdiń maqtanyshy. Dala tósin dúbirletken eńbekkerlerdiń izin jalǵap, adal eńbeginiń nátıjesinde el ekonomıkasyn nyǵaıtqan jandardyń barlyǵy jas býyn úshin úlgi-ónege. Syr óńirin damytýǵa aıtýly úles qosqan azamattarǵa qurmet kórsetý – bizdiń azamattyq paryzymyz", - dedi oblys ákimi Qyrymbek Kósherbaev.
Munan soń, aýdan ortalyǵynda aımaq basshysy eldi mekenderde shaǵyn jáne orta kásipkerlikti damytýǵa baılanysty aýdan aktıvimen jınalys ótkizdi.
Esterińizge sala keteıik, buǵan deıingi ótkizilgen kóshpeli májilisterde aımaq basshysy barlyq aýdan jáne aýyl ákimderine jappaı kásipkerlikti damytýǵa baılanysty jumystar atqarýdy tapsyrǵan bolatyn.
Oblys ákimi apta sońyna deıin dál osyndaı 6 aýdanda jáne Qyzylorda qalasynda kezdesýler ótkizedi.