«Úıi joqtyń kúıi joq» deıdi halyq danalyǵy. Ońtústik Qazaqstan oblysynda páter kezeginde turǵandar kóp. Kúrmeýli máseleniń túıini birer jylda sheshilmeıtindigi belgili. Sondyqtan ár aýdan, qala óz múmkindikterine qaraı turǵyn úıler salyp, taryqqan jandardyń saýabyn alyp jatyr.
Táýelsizdik kúni qarsańynda Tóle bı aýdanyndaǵy 480 otbasy baspanaly boldy. Bes qabatty 8 turǵyn úı «Nurly jer» baǵdarlamasy boıynsha salynǵan.
Saltanatty sharaǵa oblys basshysy Janseıit Túımebaev, oblystyq máslıhat hatshysy Qaırat Balabıev, «Nur Otan» partııasy OQO fılıaly tóraǵasynyń birinshi orynbasary Nurmahan Joldasov bastaǵan resmı adamdar qatysty.
Turǵyndardy arnaıy merekemen quttyqtaǵan Ońtústik Qazaqstan oblysynyń ákimi Janseıit Túımebaev páterlerdiń Elbasynyń memleketke tapsyrǵan baǵdarlamasy boıynsha salynyp jatqanyn aıtty.
– Bizdiń basty mindetimiz – halyqtyń áleýmettik jaǵdaıyn jaqsartyp, sapaly qyzmet kórsetý. Oblys, aýdan ortalyqtarynda, eldi mekenderde turǵyn úıler salynyp jatyr. Sonyń bir dáleli – búgin sizderdiń aýdandaryńyzdaǵy 8 kóp qabatty turǵyn úıdiń qurylysy aıaqtalyp, 480 otbasy baspanamen qamtamasyz etilip, qýanyshqa bólenip otyr. Bul baǵyttaǵy jumystar barlyq eldi mekenderde Elbasymyzdyń «Nurly jer» baǵdarlamasy aıasynda jáne jergilikti, oblystyq bıýdjet esepterinen jalǵasyn taba bermek, – dedi óńir basshysy.
Ol páter kiltterin jetim jáne ata-anasynyń qamqorlyǵynsyz qalǵan balalarǵa, áskerı jáne bıýdjettik mekeme qyzmetkerleri men áleýmettik az qamtylǵan otbasylaryna saltanatty túrde tabys etti.
Aıta keteıik, Tóle bı aýdany turǵyn úılerdiń qurylysyna 2016-2017 jyldary oblystyq bıýdjetten 2 mlrd 735 mln 406 myń 084 teńge bólinip, búginde ol tolyǵymen ıgerilgen. Sonyń nátıjesinde 29 264 sharshy metr turǵyn úı el ıgiligine berildi.
Baqtııar TAIJAN, «Egemen Qazaqstan»
Ońtústik Qazaqstan oblysy