Qazaqtyń memlekettik Muhtar Áýezov atyndaǵy akademııalyq drama teatrynda Qazaqstannyń halyq ártisi, Memlekettik syılyqtyń laýreaty Sábıt Orazbaevtyń 75 jasqa tolýyna arnalǵan shyǵarmashylyq kesh ótti.
Teatr óneriniń qarashańyraǵynda jarty ǵasyrdan astam ýaqyt boıy qyzmet etip, 100-ge tarta rólderdi somdap, kesek keıipkerlerdi tiriltken Sábıt aǵamyz búginde úlken ujymnyń aqsaqaly men aqylshysyna aınalǵan. Básekeli shyǵarmashylyq ortada shynaıy qurmetke ıe bolyp, kórermenniń rııasyz súıispenshiligine bólený kimge bolsa da ońaı emes. S.Orazbaev bul beleske adamı qasıetterimen, eńbekqorlyǵymen, qudaı bergen daryn qýatymen kóterilip otyr. Osynyń bári shyǵarmashylyq keshtiń ózegine, taǵylymdyq tusyna aınalǵan.
Iá, sahnadan san beıneni somdaǵan Sábıt Qońyrbaıuly eren eńbegi úshin «Otan», «Parasat», «Eńbek Qyzyl tý» ordenderimen marapattalǵan bolsa, qarashańyraqtyń negizin salǵan aldyńǵy býynnyń dástúr-ónegesin laıyqty jalǵastyrǵan kórnekti akterdiń táýelsiz Qazaqstannyń sahna ónerin damytýdaǵy eńbegi de úlken. A.Súleımenovtiń «Tórt taqta – jaınamaz» drama dıalogyndaǵy – Ábdinásim shal, D.Isabekovtiń «Eski úıdegi eki kezdesýindegi» – Aıtóre, B.Muqaıdyń «О́mirzaıasyndaǵy» – Álı, qyrǵyz dramatýrgi M. Ǵaparovtyń «Tuzdy shólindegi» – prezıdent, K.Ashırdiń «Qabyl – Adam Ata perzentindegi» – Ibilis, M.Baıserkenovtiń «Abylaıhannyń aqyrǵy kúnderindegi» – Buqar jyraý, sondaı-aq teatrdyń qazirgi repertýaryndaǵy F.Býlıakovtyń «Otyz ulyń bolǵanshasyndaǵy» – Abdýlla, qyrǵyz dramatýrgi B.Jákıevtiń «Júreıik júrek aýyrtpaı» dramasyndaǵy Qarııa syndy keıipkerleriniń júreginde óz zamanynyń derti bar qoǵamdyq-áleýmettik tıp deńgeıine kóterilgen beıneler ekenin eske túsirý paryz.
Áriptesteri aıtpaqshy, birde sahna sańlaǵy, birde qolynda fotoapparaty, birde beınekamerasy, birde qalamy túspeı kele jatqan dara akterdiń kórermen kózinen tasa tamasha qyrlary jetkilikti eken. T.Álimqulovsha qısyndaǵanda, «dombyrany saýsaqpen emes, kóńilmen sóıletetin» akterdiń qońyr daýysy ándi qulaǵymen emes, júregimen qabyldaıtyn ultymyzdyń kókireginde uıalap qalǵany anyq. Osyny jaqsy biletin, Sábeńniń izinen ergen teatrdaǵy dombyra ustaıtyn talantty inileri shyǵarmashylyq keshte Sábıt Orazbaev bolyp, Sábeń oınaıtyn árbir keıipkerden keıin kezegimen saıdyń tasyndaı sahnaǵa shyǵa kelýi, ulttyq teatr óneriniń órisi toqyramaǵanyn pash etkendeı.
Kórermendi birde tolqytyp, birde muńaıtyp, birde qýantqan shyǵarmashylyq kesh rejısser Qazbek Ámirjanovtyń akter Sábıt Orazbaevtyń ómir jolyna arnalǵan «О́mir – dastan» derekti fılm úzindilerimen órilip otyrdy. Bul týyndyda sonaý Ońtústik Qazaqstan oblysynyń shalǵaıyndaǵy aýyldan shyǵyp, ónerdiń shaýjaıyna jarmasqan balań jigittiń óz bıigine qalaı kóterilgeni retimen baıandalady. Bul fılmde dara akter ǵana emes, jaqsy áke, súıikti jar, aqylgóı ata bola bilgen azamat ómiriniń paraqtary bar.
Aldymen shyǵarmashylyq keshte Mádenıet mınıstriniń orynbasary Asqar Bóribaev Elbasynyń Sábıt Orazbaevtyń 75 jyldyǵyna joldaǵan quttyqtaýyn jetkizdi. Akterge Ońtústik Qazaqstan oblysynyń Qurmetti azamaty ataǵy berilgenin týǵan jerinen kelgen arnaıy delegasııa málim etti.
О́ziniń mazmundy ǵumyry sııaqty áserli keshte áriptesi KSRO jáne Qazaqstannyń halyq ártisi Asanáli Áshimov sóz alyp, jastyqtyń qyzyǵyn birge keshken zamandasy jaıly tamasha estelik tarqatsa, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń dırektory, belgili rejısser Talǵat Temenov akterdiń aǵa retindegi, adam retindegi beınesin sózben somdady.
Keshte jurtty taǵy bir tolqytyp ótken sát sahna sańlaǵynyń ózimen ónerge óksheles kelgen akter, aktrısalarmen birge jurt aldyna shyǵyp, ustazy Asqar Toqpanovqa arnaǵan arnaýy edi. Áli kúnge deıin úırenýmen, áli kúnge deıin izdenýmen, eńbektenýmen kele jatqan óner ıesiniń el azamaty retinde de keıingilerge kórseter úlgisi kóp. Kesek tulǵaly akter «ákem teatrdyń» qara ormandaı talantty ujymy ortasynda ǵıbratty áńgimesimen, jasyna saı jarasymdy batasymen keshti aıaqtady.
Aınash ESALI,
Almaty.
Sýretterdi túsirgen Nurǵısa ELEÝBEKOV.