Senbi kúni Kólik jáne kommýnıkasııa mınıstri Berik Kamalıev pen Aqmola oblysynyń ákimi Sergeı Dıachenkonyń qatysýymen «Shýche – Býrabaı kýrortty aımaǵy» avtomobıl jolynyń ashylý saltanaty bolyp ótti.
Elbasynyń tikeleı tapsyrmasymen 2009 jyly Qazaqstandaǵy alǵashqy alty jolaqty, joǵary jyldamdyqty «Astana – Shýche» avtomagıstrali paıdalanýǵa berildi, dedi óz sózinde mınıstr B.Kamalıev. Osynyń nátıjesinde eki aralyqtaǵy ýaqyt eki ese qysqaryp, jol apaty da eki ese azaıdy. Búgin týrıstik klasterdi damytý sheńberinde kýrortty aımaqqa tóte bastaıtyn 8,9 shaqyrymdyq tórt jolaqty trassa ashylyp otyr. Joldyń ón boıynda qorshaýlar, kópirler, eldi mekender aýmaǵynda elektr jaryǵy ornatylyp, jaıaý júrginshilerge qajetti jaǵdaılar jasaldy. Jalpy, Aqmola oblysy búgingi kúni iri avtojol jobalaryn iske asyrýda jáne zamanaýı tehnologııalardy qoldanýda kóshbasshy bolyp otyrǵanymen quttyqtaımyn.
Oblys ákimi S.Dıachenko búgingi qýanyshty sharanyń Aqmola oblysynyń Astanadaǵy kúnderi qarsańynda ótip otyrǵany jurtshylyqty serpiliske túsirgenin aıtty. Kýrortty aımaqtyń tartymdylyǵyn arttyrý maqsatynda atqarylyp jatqan ister úshin alǵys bildirgen ol Kókshetaý qalasy áýejaıynda ushý-qoný jolaǵyn qaıta salý jobasy oıdaǵydaı atqarylyp jatqandyǵyn málimdedi.
Baqbergen AMALBEK,
Aqmola oblysy.