Táýelsizdiktiń 20 jyldyǵyna oraı Almaty qalasynda shekarashylarǵa 120 páterdiń kilti saltanatty túrde tabys etildi. Bar ǵumyryn shekara ómirine arnaǵan ardagerler men UQK Shekara qyzmetiniń Almaty garnızonynda qyzmet atqaratyn áskerı qyzmetshileri úshin bul kún erekshe este qaldy. Jańa qonystyń ıelerin UQK Tóraǵasynyń orynbasary – Shekara qyzmetiniń dırektory general-maıor N.Myrzalıev quttyqtady.
Prezıdent N.Nazarbaevtyń únemi qoldaýynyń arqasynda el shekarasy barlyq endikteri boıynsha nyǵaıtylýda, sondaı-aq, el shebin kóziniń qarashyǵyndaı kúzetip júrgen shekarashylardyń áleýmettik turmysyna basa kóńil bólinýde. Sonyń naqty aıǵaǵy, shekarashylar úshin turǵyn úıler salynýda, jańa páterler satyp alynýda. Oǵan Qazaqstan Táýelsizdiginiń 20 jyldyǵy qarsańynda ótip jatqan osyndaı saltanatty sharalar sózimizge dálel bola alady. Máselen, bir aı buryn UQK Shekara qyzmetiniń «Ońtústik» aımaqtyq basqarmasynyń 60 áskerı qyzmetshisi jańa páterge kóship, qonys toıyn toılady.
«Egemen-aqparat».