Shyǵys Qazaqstannyń iri óndiris oryndary jańa tehnologııa negizinde quny 15 mlrd teńgeniń 13 jobasyn júzege asyrady. Bıyl Zyrıan aýdanynda Turǵysyn sý elektr stansasy paıdalanýǵa berilip, 2019 jyly Ulan jáne Jarma aýdandarynda úsh sý jáne jel elektr stansalarynyń qurylysy aıaqtalady.
Semeı men Aıagózde et kombınaty salynyp, О́skemende robottandyrylǵan hırýrgııa jáne transplantasııa ortalyǵy ashylyp, qýaty 120 myń tonnalyq qoqys óńdeý zaýyty boı kóteredi. Aýyldardy sapaly aýyz sýmen qamtamasyz etý úshin quny 13,7 mlrd teńgeniń 37 jobasy iske qosylady. «Sıfrly Shyǵys» jobasy bastalady.
Oblys ákimi Danıal Ahmetov О́skemende Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn talqylaǵan aktıv jınalysynda mańyzdy qujatty júzege asyrý úshin óńirde osyndaı aýqymdy jumystardyń qolǵa alynatynyn aıtty. «Bıylǵy Joldaý «Qazaqstan-2050» Strategııasyn oryndaý jolyndaǵy jasampaz isterdiń taǵy bir keleli kezeńi. Álemdik básekege qabiletti bolýdyń kezekti baspaldaǵy. Memleket basshysy ýaqyt talabynan týyndaıtyn ózekti máselelerdi sheshýdiń joldaryn aıqyndap berdi. Dúnıe júzin qamtyp otyrǵan tórtinshi ónerkásiptik revolıýsııa jaǵdaıyna beıimdelý jáne elimizdiń odan ári órkendeýine tyń serpin beretin 10 negizgi mindetti atap kórsetti. Prezıdenttiń ekonomıkany ındýstrııalandyrýǵa jáne sıfrlandyrýǵa qatysty tapsyrmasynyń mańyzy erekshe. Innovasııany endirmeı, IT salasyn jáne ınjınırıngtik qyzmetterdi jetildirmeı álemdik standarttarǵa saı ónimder shyǵarý múmkin emes», dedi aımaq basshysy.
Elbasy Joldaýda agroónerkásip keshenine «Aqyldy tehnologııalardy» engizý máselesine aıryqsha toqtalǵany belgili. Jıynda sóz alǵan «Maıly daqyldardyń tájirıbe sharýashylyǵy» JShS dırektory Farıd Ábitaev jańa tehnologııalardy engizý nátıjesinde sońǵy 5 jylda mal sharýashylyǵynda jumys isteıtin qyzmetkerlerdiń jalaqysyn 40 myńnan 120 myńǵa deıin ulǵaıtqanyn, shetelden 6 maman shaqyrǵanyn atap ótti. «2012 jyly jylyna 2700 tonna sút óndirgen edik, ol kezde 120 adam jumys istedi. Qazir 86 adam jumys isteıdi, biraq jylyna 8 myń tonna sút daıyndalady. Mine, jańa tehnologııalardyń nátıjesi. Bizdiń fermada jumys istegisi keletin jastar kóp. Traktorlarymyz kompıýtermen jaraqtandyrylǵan. Fermada eńbek etetin jastar jumysyn aıaqtaǵannan keıin traktoryn qoıady da ınternetke kirip, áleýmettik jelide otyrady», dedi ol.
Oblystyq onkologııalyq dıspanserdiń bas dárigeri Gúlmıra Saǵıdýllına Prezıdent Joldaýynda kórsetilgen aýrýdyń aldyn alýǵa baǵyttalǵan jumystardyń óńirde júzege asyrylý barysyna toqtalyp, byltyr aımaqtaǵy emhanalarǵa 8,5 mıllıard teńgege jańa medısınalyq qurylǵylar satyp alynyp, ornatylǵanyn tilge tıek etti. Bas dáriger ózi jetekshilik etetin aýrýhanaǵa 800 mıllıon teńgege dıagnostıkalyq jáne emdeý qurylǵylary qoıylǵanyn, bul onkologııalyq naýqastardy aldyn ala dıagnostıkalaýǵa jáne ýaqtyly emdeýge múmkindik beretinin aıtty. «Endi aımaq turǵyndary oblystan shyqpaı-aq osynda tekserýden óte alady», dedi bas dáriger.
Aktıv jıynynda sonymen qatar «Qazsınk» JShS kommýnıkasııa basqarmasynyń basshysy Berikbek Kzykeev, Qazaqstan-Amerıka erkin ýnıversıtetiniń prorektory Marına Kıkına, О́skemen qalalyq jastar resýrstyq ortalyǵynyń dırektory Rınat Ahmetjanov Joldaýdaǵy basym baǵyttarǵa baılanysty oılaryn ortaǵa saldy.
Azamat QASYM, «Egemen Qazaqstan»
Shyǵys Qazaqstan oblysy