Memleket medısınaǵa únemi qoldaý kórsetip keledi. Al jeke adamdar óz densaýlyǵyna jete kóńil bóledi dep aıta almaımyz, ókinishke qaraı.
Kópshiliktiń jany qysylǵanda, aıtqan jerden aýlaq, aýrý alqymnan alǵanda dárigerge júgiretini jasyryn emes. Ásirese aýyldaǵy aǵaıynǵa aýrýdyń aldyn alý, alǵashqy kómekti sapaly kórsetý mańyzdy. Iаǵnı ár aýyldyń bilikti mamanmen jáne medısınalyq qural-jabdyqtarmen qamtamasyz etilýi zaman talaby.
Bul oraıda Saıram aýdany, Tespe aýylynda taıaýda paıdalanýǵa berilgen quramaly modýldi medısınalyq pýnkt turǵyndar úshin qoljetimdi ári tıimdi bolyp otyr. Qurylysy qyrýar qarjyny qajet etpeıtin emdeý mekemesin iske qosýǵa eki-aq aı ýaqyt ketken. Alańy 125 sharshy metr bolatyn, medısınalyq quraldarmen jabdyqtalǵan modýldik konstrýksııanyń quny – 30 mln teńge. Jalpy, Saıram aýdanynda bıyl budan bólek osyndaı 5 medısınalyq tirek ornatylady. Sóıtip aýdannyń densaýlyq saqtaý nysanyna degen qajettiligi 100 paıyz sheshilmekshi. Sonymen qatar Saryaǵash aýdanynda – 13, Báıdibek aýdanynda – 3, Túlkibas aýdanynda 2 modýldi medpýnkt paıdalanýǵa beriledi.
Tespe aýyly turǵyndarynyń qýanyshyn bólisken Ońtústik Qazaqstan oblysynyń ákimi Janseıit Túımebaev elimizde otandyq medısınany damytýǵa basa nazar aýdarylyp jatqanyn jetkizdi.
– Elbasy N.Nazarbaev halyqqa arnaǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda medısınalyq kómektiń qoljetimdiligi men tıimdiligin arttyrý qajettigin atap kórsetti. «Halyqtyń ómir súrý uzaqtyǵynyń ósýine jáne medısınalyq tehnologııalardyń damýyna baılanysty medısınalyq qyzmet kórsetýge degen suranys kólemi arta túsetin bolady. Qazirgi densaýlyq saqtaý isi qymbatqa túsetin stasıonarlyq emge emes, negizinen aýrýdyń aldyn alýǵa baǵyttalýǵa tıis», ekeni de Elbasy Joldaýynda aıtyldy. Mine, osy baǵyttaǵy jumystardy júzege asyrý maqsatynda oblys ákimdigi tarapynan tıisti jumystar atqarylyp jatyr. Máselen, medısınalyq tirekterdiń qurylysyn júrgizýge modýldik konstrýksııa úlgisi usynylyp otyr. Ony qurastyrý tásili ýaqytty únemdeýge jáne bıýdjet qarajatyn tıimdi jumsaýǵa oń áserin tıgizedi. Osyndaı medısınalyq tirekte naýqastarǵa birinshi medısınalyq-sanıtarlyq kómek kórsetiletin bolady, – dedi oblys ákimi.
Sondaı-aq búginde Saıram aýdanynyń ortalyǵy – Aqsýkent aýylynda 500 kelýshige arnalǵan emhana qurylysy júrgizilýde. Budan bólek, kompıýterlik tomograf satyp alynyp, ınsýlt ortalyǵyn ashý josparlanyp otyr. Aıta ketelik, oblysta jyl sońyna deıin taǵy 47 quramaly modýldi medpýnkt iske qosylmaq. Jalpy, óńirde 846 medısınalyq nysan halyqqa dárigerlik kómek kórsetedi, onyń 225-i medısınalyq tirek.
Ǵalymjan ELShIBAI, «Egemen Qazaqstan»
Ońtústik Qazaqstan oblysy