Byltyrǵy qys óskemendikter úshin qatqyldaý tıip, kósheler men jol boıyndaǵy qar ýaqtyly tazalanbaı qala basshylyǵyna turǵyndar tarapynan syn-eskertpeler kóp aıtylǵan edi. «Qys shanańdy jaz saıla» degendeı, bıyl osyndaı olqylyqqa jol bermes úshin shahar bıligi «kári qudany» kútip alýǵa erte bastan qamdanypty.
Osy maqsatta Germanııadan turǵyn úı-kommýnaldyq sharýashylyǵy men jol qurylysy salasynyń sarapshysy Ervın Fleısherdi arnaıy shaqyrǵan. «Nemis mamany tehnıkalar men qyzmetkerler sanyn kóbeıtý qajettigin aıtty. Onyń usynys-pikirlerin eskerip, «Foton» dep atalatyn kóp fýnksııaly 10 jańa mashına satyp aldyq. Bir jaqsysy, bul tehnıkany qysta da, jazda da jol tazalaýǵa paıdalanýǵa bolady. Sonymen qatar avtoparkimiz 4 greıdermen jáne 2 shnekti rotormen tolyqty. О́tken jyly greıderler jol ústindegi muzdy tazalaı almaǵandyqtan fındik muz jarǵysh tehnıka satyp aldyq. Qala tazalyǵyna jaýapty «О́skemen tártip» mekemesindegi jumysshylar sanyn 500-ge jetkizdik. Qysqasy, tehnıka men jumysshylar saqadaı saı. Alaıda qalada byltyrǵydaı qalyń qar men siresken muzdyń joqtyǵynan bul tehnıkalardy áli paıdalana almaı otyrmyz. Ázirge qańtarylyp tur», deıdi О́skemen qalasynyń ákimi Qýat Tumabaev. Nemis sarapshysy bizdegi kóbine ashyq-shashyq jatatyn kanalızasııalyq lıýkterdiń ornalasýyna qatysty da óz oıyn bildiripti. Sheteldik maman munyń kólik júrgizýshilerine qolaısyz ekendigin aıtyp, Eýropa men AQSh-taǵydaı jaıaý júrginshiler jolyna ornalasqany durys depti.
Qala basshysy ótken jyl О́skemen úshin tabysty bolǵanyn, oblys ortalyǵynda Elbasynyń qatysýymen «Nurly jol» saıabaǵy ashylǵanyn, shaharda 23 shaqyrym jol ortasha jóndeýden ótkenin, 20 jylǵa jýyq úı kezeginde turǵan turǵyndar baspanaǵa qol jetkizgenin aıtady. Al 2018 jyly qala kóshelerin jaryqtandyrý, abattandyrý, joldardy keńeıtý jumystary jalǵasyn taýyp, Jibek matalar shaǵyn aýdanynda úlken saıabaq salynady. Taǵy bir jaǵymdy jańalyq, jaqynda osy shaǵyn aýdanda 1000 oryndyq qazaq mektebiniń qurylysy bastaldy.
Azamat QASYM, «Egemen Qazaqstan»
О́SKEMEN