Atyraý oblystyq tarıhı-ólketaný mýzeıiniń qorynda 60 dombyra bar. «О́lke mádenıeti men ádebıeti» ekspozısııalyq zalynda kúı atasy Qurmanǵazy Saǵyrbaıuly týraly derekter, Dına Nurpeıisovanyń dombyrasy, óńirden shyqqan belgili óner sheberleriniń tutynǵan buıymdary men aspaptary jınaqtalǵan. «Rýhanı jańǵyrý» jobasy aıasynda mýzeıde taǵy bir ıgilikti shara ótip, «Dombyra-dastan» atty kitaptyń tusaýkeseri uıymdastyryldy.
Kitapta ǵasyrlar boıy ár qazaqtyń tórinen oryn alǵan ulttyq aspap, onyń shyǵý tarıhy, ánshi-kúıshilerdiń jan serikterine aınalǵan dombyralar jaıly jazylǵan. Dombyra jasaýshy qolóner sheberleriniń eńbekteri de jınaqtan tys qalmady. Ulttyq murany jyrǵa qosqan aqyndardyń óleńderi de kitapqa engizildi.
Sharaǵa qatysqan Qazaqstannyń jáne Qyrǵyzstannyń eńbek sińirgen qaıratkeri, kompozıtor Ilıa Jaqanov, Qazaqstan Jýrnalıster jáne Jazýshylar odaqtarynyń múshesi, ólketanýshy О́tepbergen Álimgereev pen aımaqtaǵy zııaly qaýym ókilderi jańa kitaptyń mańyzy týraly baıandady. «Dına Nurpeıisova atyndaǵy halyqtyq mýzyka akademııasy» Atyraý mýzyka kolledjiniń stýdentteri mýzeıde turǵan Qarshyǵa Ahmedııarov, Hamıt Erǵalıev, Rysbaı Ǵabdıev, Mekes Tóreshev, Shámil Ábiltaev, Narıman Úlkenbaıuly, Ǵataý Ibishev syndy óner tarlandarynyń dombyralarymen kúı tartty.
– Kúlli qazaqqa esimderi belgili óner ıeleri dombyralarynyń bizdiń mýzeıde saqtalýy – maqtanysh. Jas dombyrashylar da ózderi úlgi etetin aǵa-apalary oınaǵan aspaptarda kúı tartý mártebesine ıe boldy. «Dombyra-dastan» kitaby bes bólimnen turady, onda qazaqtyń dástúrli óneri jaıly kóp maǵlumat bar, – deıdi mýzeıdiń etnografııa jáne ólke tabıǵaty ǵylymı-zertteý bóliminiń sektor jetekshisi S.Nurpeıisova.
Baqytgúl BABASh, «Egemen Qazaqstan»
ATYRAÝ