«Astana» velokomandasy taǵy da tamasha óner kórsetip, qorjynǵa kezekti júldesin saldy. Birikken Arab Ámirlikterinde ótip jatqan «Dýbaı týry» kópkúndiginde sprınterimiz Rıkardo Mınalı Ras Al Haım dep atalatyn ekinshi kezeńde kózge tústi. Keshe ǵana ekinshi kelgen Magnýs Korttyń kórsetkishinen keıin bul qatarynan kelip turǵan olja edi.
- Márege jaqyndap qalǵan tusta men jaqsy pozısııada boldym. Sońǵy burylysty da sátti óte bildim. Al 300 metr qalǵan tusta men sál keıinirek sheginshektep, ortaǵa qaraı oıysyp kettim. Azyn-aýlaq kútip turdym da, Vıvıanıdiń artyn ala jyldamdyqqa bastym. Nátıjesinde úshinshi keldim. Bálkim maǵan sprıntti sál erterek baýtaý kerek pe edi, bilmedim, alaıda osy kórsetken nátıjemniń ózi jaman emes. Jalpy, jarys kúni aýyr ótkenine qaramastan júldeli bolǵanyma qýanyshtymyn, - dedi Rıkardo Mınalı.
«Dýbaı týrynyń» ekinshi kezeńi SkaıDaıv Dýbaıdan bastalyp 190 shaqyrymnan soń Ras Al Haımda aıaqtaldy. Kópshilik kútkendeı-aq kezeń jappaı sprıntpen aıaqtaldy. «Astana» shabandozdary Jandos Bıjigitov, Trýls Korset jáne Rýslan Tileýbaevtar komanda sprınteri Rıkkardo Mınalı di alǵa shyǵarý úshin sońǵy 20 shaqyrymda keremet qyzmet etti. Al sońǵy shaqyrymda Mınalı jaqsy pozısııa tańdaı bilip, kezeń jeńimpazy Elıa Vıvıanı men ekinshi kelgen gollandııalyq Dılan Grýnevegenmen birge máre syzyǵyn kesti.
Al «Astananyń» taǵy bir sprınteri Magnýs Kort Danııl Fomınyh pen Laýrens De Vrızdiń kómegimen fınaldyq sprıntte joǵarǵy nátıje tirkep, 6-oryn aldy.
- Kezeń keshegideı jaqsy ótti deı alamyn. Bul bir ózi jyldam jarys boldy ǵoı dep oılaımyn. Keshe jaqsy pozısııa alyp, máre syzyǵynda baǵym janǵan. Búgin kerisinshe jol-jónekeı qarsy turǵan jelge tap bolyp, kóp kúsh joǵalttym. Sonyń kesirinen bolsa kerek, sońǵy metrlerde sarqylyp qaldym. Degenmen, komandamyzdyń taǵy bir shabandozy Rıkardo júldeli orynǵa ıe boldy. Sondyqtan da, búgingi nátıjeler biz úshin jaman dep aıta almaımyn. Álemniń myqty sprınterlerimen básekelese júrip osyndaı oryndarǵa ıe bolý men úshin zor abyroı, - dedi Magnýs Kort.
Gollandııalyq Grýnevegen «Dýbaı Týry» jarysynda basty esepte birinshi orynda. Ol Elıa Vıvıanıdi 2 sekýndqa ozyp tur. «Astananyń» eki birdeı shabandozy Magnýs Kort pen Rıkkardo Mınalı 4-5 oryndardy alyp tur. Olardyń lıderden qalyp turǵan ýaqyty sáıkesinshe 10 jáne 12 sekýnd ýaqytty quraıdy.
«Dýbaı Týrynyń» úshinshi kezeńi SkaıDaıv Dýbaı men El-Fýdjaıra emıratynyń aralyǵynda ótedi (183 km).
Ermuhamed MÁÝLEN
«Egemen Qazaqstan»