Elbasy Nursultan Nazarbaevtyń Qazaqstan halqyna arnaǵan qaı jylǵy Joldaýyn alsańyz da ǵylym men bilim salasyn aınalyp ótken emes. Bul túsinikti de. О́ıtkeni Memleket basshysy táýelsiz Qazaqstannyń keleshegi bilimdi urpaqtyń qolynda ekenin udaıy aıtyp keledi. Bul másele tek sóz júzinde qalyp jatqan joq. Memleket tarapynan bilim júıesine barlyq qamqorlyq bar. Basqasyn aıtpaǵannyń ózinde, mektepterdiń qurylysy úshin bólinetin qarajat jyldan-jylǵa artyp otyr.
Ońtústik Qazaqstan oblysynda halyq tyǵyz ornalasqandyqtan, bala týý kórsetkishi óte joǵary. Mektepke baratyn bala jetkilikti. Eń basty másele – mektep jetpeıdi. Onyń ústine birqatar bilim mekemeleriniń paıdalanýǵa berilgenine birneshe jyl bolǵandyqtan, apatty jaǵdaıda. Bul – Saryaǵash aýdanyna da tán jaǵdaı. Mine, osy máseleni eskere otyryp, sońǵy jyldary bizdiń oblysta mektep qurylysyna erekshe kóńil bóline bastady. Bir ǵana Saryaǵash aýdanynda sońǵy úsh jyldyń ózinde 23 mektep paıdalanýǵa berildi. Qazirgi ýaqytta aýdanda 16 mekteptiń qurylysy júrip jatyr. Al osy jyldyń kókteminde taǵy da 15 mekteptiń qurylysy bastalady degen jospar bar. Osynyń nátıjesinde aýdanda mektep problemasy laıyqty sheshimin taýyp, bilim sapasy aıtarlyqtaı jaqsarady degen úmittemiz. О́ıtkeni muny zamannyń ózi talap etip otyr. Muny Elbasy bıylǵy Joldaýynda taǵy da basa aıtty.
Memleket basshysynyń bilim berý salasy mamandarynyń aldyna qoıyp otyrǵan talaby óte oryndy. Joldaýda atap kórsetkendeı, bilim berý baǵdarlamalarynyń negizgi basymdyǵy ózgeristerge únemi beıim bolý jáne jańa bilimdi meńgerý qabiletin damytý bilim mekemeleriniń qazirgi ýaqyttaǵy basty ustanymdarynyń biri bolýy tıis. О́ıtkeni bul sala zaman kóshinen, ýaqyt talabynan qalys qalmaýy tıis. О́zgeris qajet. Serpilis qajet. Mektep baǵdarlamalary da zaman talabyna saıma-saı jetildirilip, jańarýy tıis. Al bul úshin balalarǵa dáris beretin ustazdardyń ózderi únemi izdenip, oqý-bilimderin jetildirip, ozyq tájirıbelerin bólisýi qajet. «Joǵary oqý ornyn bitirgenmin, qaltamda dıplomym bar, muǵalim bolǵanyma talaı jyl boldy, endi maǵan odan ári oqý-bilimniń qajeti joq» dep oılaıtyn muǵalim qatelesedi. Ustaz árdaıym bilimi men tájirıbesin tolyqtyryp otyrýy qajet. «Bilim – ınemen qudyq qazǵandaı» dep tegin aıtylmasa kerek. Muny ár muǵalim bir sát te jadynan shyǵarmaýy tıis dep oılaımyn. Qazir Saryaǵash aýdanynda 138 bilim oshaǵy bar. Onda 83 169 bala bilim alady. 8641 ustaz dáris beredi. Olardyń ishinde eńbek tájirıbesi jetkilikti muǵalimder de, jastar da bar. Barlyǵy da qazirgi ýaqytta bilim mekemelerine júktelip otyrǵan aıqyn maqsat-mindetterdi jete túsinip, soǵan saıma-saı bolýy tıis.
Baýyrjan MAIRIHOV,
Saryaǵash aýdandyq bilim bóliminiń basshysy
Ońtústik Qazaqstan oblysy