Ortalyq kommýnıkasııalar qyzmetinde Qazaqstan ekonomıkasyndaǵy eń ózekti taqyryp – munaı-gaz jobalarynyń iske asyrylýy boıynsha baspasóz máslıhaty ótti. Jıynǵa barysynda Qazaqstan munaı-servıs kompanııalar Odaǵynyń Tóralqa Tóraǵasy Rashıd Jaqsylyqov atqarylyp jatqan jumystarǵa tolyǵyraq toqtalyp ótti.
«Osydan 7-8 aı buryn sizdermen jolyqqanymyzda biz batys óńirimizdegi munaı-gaz salasynda bolyp jatqan ózgerister jóninde jáne bolashaqta iske asatyn jobalar jóninde baıandaǵan bolatynbyz. Sol kezde maqsatymyz neǵurlym qazaqstandyq negizdi nyǵaıtý jáne otandyq kompanııalardyń sol jobalarǵa at salysyp, basty rólde oınaýyna yqpal etemiz degenbiz. Iá búgingi tańda úlken «Teńizshevroıl» kompanııasynyń úshinshi zaýyty jumysyn tolyq qandy bastady. Alǵashqy úlken tórt tendr oınatyldy. Onyń ekeýiniń jeńimpazy belgili boldy. Qalǵan ekeýi mamyr aıyna qalyp otyr. Maqtanyshpen aıtatyn taǵy bir jaıt, ózderińizge belgili iri jobalarǵa bizdiń otandyq kompanııalar úsh sebeppen qatysa almaıdy. Sebebi, birinshiden lottar óte úlken. Mıllıard dollor tóńireginde. Tendr talaby boıynsha sol sýmmanyń 30 paıyzyn kepildikke berý kerek. Ondaı kepildik bere qoıatyn bizdiń kompanııalardyń qarjylaı múmkindigi joq bolǵandyqtan biz sheteldik kompanııalarmen konsorsıým qurý baǵytyn qolǵa alǵanbyz. Sol konsorsıýmdardyń ishinde «Asar» degen konsorsıým tórt jobanyń bireýin utyp aldy. Bul Qazaqstannyń jáne otandyq kompanııalardyń jeńisi dep baǵalaýǵa bolady. Jáne de zaýyt salynyp bitkennen keıin ony iske qosý prosesi júredi. Bul jerde de qazirgi tańda aǵylshyn kompanııasymen qazaqstandyq kompanııalardyń basyn qosyp, «Mura» degen úlken konsorsıým qurý jumysyn bastap kettik. Bul jumys eki jyldan keıin iske qosylady», dedi R.Jaqsylyqov.
Sonymen qatar ol búgingi tańda qazaqstandyq naryqta «Teńizshevroıl», «Karachaganak Opereıtıng Kompanı» jáne «Nort Kaspıan Opereıtıng Kompanı» ispettes úsh iri operatorlar ortaq bıýdjeti 45 mlrd. dollardy quraıtyn aýqymdy munaı-gaz jobalaryn iske asyryp jatqanyn tilge tıek etti.
«Jaqyn arada batys óńirimizde 45 mlrd. dollaryna turatyn úlken jobalarǵa jumys bastalady. Soǵan elimizdiń shalǵaı jatqan basqa óńirindegi kompanııalarda at salysyp, shamasy kelgenshe ózderiniń múmkindigin paıdalanyp, sol jumystarǵa aralasyp, azamattyq jumystan arylyp, óndiristik jumysqa bet bursa deımiz. Qazirgi tańda munaı-gaz salasynyń óndirisine qyzmet kórsetip júrgen kompanııalardyń damýyna taǵy da qandaı yqpal ete alamyz degen maqsat tóńireginde jumys jasaýdamyz», dedi ol.
«Logic Services Kazakhstan» kompanııasynyń basshylar Keńesiniń Tóraǵasy Serbolat Shoraev «Logic Services» degen mekemeni 2010 jyly Avstralııalyq «Logic» degen kompanııasymen birlesip Atyraý qalasynda qurǵanyn atap ótti.
«Sol ýaqyttan beri iri, úlken, orta masshtabtaǵy jobalardan tórteýin bitirdik. «Qashaǵan» jobasynyń sońyna qaraı keldik. Sol jobamen jumys bastadyq. Qazir ózimizdiń esebimiz boıynsha qaraıtyn bolsaq, bizdiń qolymyzdan 12 myń adam jumys tapqan eken», dedi ol.
Raýan QAIDAR, «Egemen Qazaqstan»