Jalpy, elimizdiń latyn grafıkasyna kóshýi tildi jańǵyrtý boıynsha mańyzdy qadam dep esepteımiz. Qadam qazaq tiliniń álemdik bilim, ǵylym jáne aqparattyq keńistikke beıimdelýine jol ashady. Sondyqtan Elbasynyń bul sheshimi strategııalyq turǵydan elimizdiń bolashaǵy úshin mańyzdy.
Barshamyzǵa málim, osy ýaqytqa deıin jańa álipbıimizge qatysty san túrli qoǵamdyq pikir qalyptasty. Usynystar arasynda bolǵan dıgraf máselesi talqyǵa tústi. Budan keıin bekitilgen latyn álipbıi boıynsha apostrof máselesi de oń jáne teris pikirler týyndatty. Nátıjesinde, Elbasynyń sheshimine sáıkes jańa álipbıimizde apostroftar alynyp, árip ústine qoıylatyn tańbadan turatyn akýt pen eki dıgraf endi.
Bul ózgeristerde barlyq mamandardyń usynystary eskerildi dep oılaımyz. Ásirese aqparattyq tehnologııalar salasy mamandarynyń pikirlerine sáıkes ózgeristi erekshe ataýymyzǵa bolady. Esterińizde bolsa, sala mamandary apostroftar mátin terýde jáne izdeý tehnologııasyn paıdalanýda qıyndyqtar týyndatatyndyǵyn aıtqan edi.
Latyn grafıkasyndaǵy álipbıdiń jańa nusqasymen tanysqannan keıin de qoǵamda ártúrli pikirler qalyptasyp jatqandyǵy baıqalady. Menińshe bul nusqasy burynǵyǵa qaraǵanda qolaıly sekildi. Degenmen fılologııa ǵylymdary salasynyń ókili bolmaǵandyqtan, birjaqty aıtý da qıynǵa soǵatyny anyq. Árıne latyn qarpimen kompıýterde terý ázirge kóp ýaqyt alady. IT salasynyń mamandary da pernetaqtalardy jańa úlgige sáıkes beıimdeýleri qajet. Munyń barlyǵy kóz ben qoldyń úırenispegendiginen dep oılaımyn. Ýaqyt óte kele oǵan da qalyptasyp ketetinimiz anyq.
Murat NASIMOV, «Bolashaq» ǵylymı-zertteý ınstıtýtynyń dırektory
Qyzylorda