Din isteri jáne azamattyq qoǵam mınıstri Nurlan Ermekbaev Qostanaı oblysynda azamattyq qoǵam ókilderimen kezdesip, Memleket basshysynyń Qazaqstan halqyna Joldaýynyń negizgi baǵyttaryn túsindirdi.
Kezdesý barysynda qatysýshylardyń biri mınıstrge suraq qoıyp, mınıstrlik pen Qazaqstan musylmandary dinı basqarmasynyń arasyndaǵy ózara is-qımyldy bes baldyq shkala negizinde qalaı baǵalaıtynyn surady.
«Biz Qazaqstandaǵy barlyq resmı tirkelgen dinı birlestiktermen, sonyń ishinde Qazaqstannyń eń iri dinı birlestigi – Qazaqstan musylmandary dinı basqarmasymen de syndarly qarym-qatynasta jumys jasaımyz», dedi mınıstr.
N.Ermekbaevtyń aıtýynsha, mınıstrlik Dinı basqarmaǵa ártúrli baǵyttaǵy mańyzdy máselelerdi sheshýde qoldaý kórsetedi.
«Dinı saladaǵy barlyq usynystarymyz ben sheshimderimiz boıynsha biz QMDB basshylyǵymen aldyn ala konsýltasııalar ótkizemiz, olarmen keńesemiz, sondaı-aq basqa da iri konfessııalar basshylyǵymen keńesemiz. Sondyqtan Múftııatpen ózara baılanysymyzǵa bes degen baǵa beremin. Sondaı-aq Qazaqstandaǵy ekinshi úlken konfessııa bolyp tabylatyn Orys pravoslavıe shirkeýimen de ózara is-qımylymyzdy bes degen balmen baǵalaımyn. Basqa konfessııalarmen de baılanysymyz óz deńgeıinde», dedi ol.
Esterińizge sala keteıik, 23-24 aqpan kúnderi mınıstr Nurlan Ermekbaev Qostanaı oblysyna jumys sapary barysynda oblys ákimi Arhımed Muhambetovtiń halyq aldyndaǵy eseptik kezdesýine qatysty. Sondaı-aq mınıstr oblystaǵy birqatar uıymdardy, óńirdegi mádenı jáne rýhanı nysandardy aralady. Onyń ishinde Aımaǵanbet qajy Spanuly atyndaǵy oblystyq meshitke baryp, ımamdarmen kezdesýinde QMDB-nyń oblystyq fılıaly jumysyndaǵy máselelerdi talqylady.
«Egemen-aqparat»