Reseı ǵylym akademııasynyń akademıgi Abel Aganbegıan men Reseı prezıdenti janyndaǵy Reseı halyq sharýashylyǵy jáne memlekettik qyzmet akademııasy ǵylymı keńesiniń múshesi Sergeı Kalendjıan Strategııany ázirlegen Qazaqstan-Reseı birlesken jumys tobynyń otyrysyna qatysty. Sharaǵa oblys ákimi Qyrymbek Kósherbaev, oblys ákiminiń orynbasarlary, memlekettik organdardyń basshylary qatysty.
Esterińizge sala keteıik, 2013 jyldyń jeltoqsanynda Reseı ǵylym akademııasynyń akademıgi Abel Aganbegıan jetekshilik jasaǵan qazaqstandyq jáne reseılik ǵalymdar men mamandardyń qatysýymen ázirlengen Qyzylorda oblysynyń 2020 jylǵa deıingi áleýmettik-ekonomıkalyq damý strategııasy qabyldanǵan bolatyn.
Strategııany júzege asyrýdyń aralyq nátıjeleri eki jyl saıyn qorytyndylanyp otyrady. 2016 jyly Abel Aganbegıan óńirge kelip, «Qyzylorda aıtarlyqtaı ózgerdi, degenmen áli de kóp jumys istelýi kerek jáne bolashaqqa degen úmit bar», - dep óńirdiń damýyna oń baǵa bergen bolatyn.
Kezdesýdi ashqan oblys ákimi Qyrymbek Kósherbaev aımaqtyń damý qarqynyn kórsetetin barlyq makroekonomıkalyq kórsetkishter boıynsha oń dınamıkaǵa qol jetkizgenin atap ótti. Sońǵy 5 jylda munaı óndirisiniń 2 esege tómendeýine baılanysty oblys 2017 jyly tek bir ǵana kórsetkish - ónerkásiptik óndiris kólemi boıynsha oń vektorǵa qol jetkize almady.
«2013 jyly Damý strategııasyn qabyldaǵan kezde bizdiń aldymyzǵa qoıǵan basty mindet – ekonomıkany ındýstrııalandyrý arqyly ártaraptandyrý bolatyn. Sońǵy bes jyl ishinde oblysymyzda 50-den astam ónerkásip nysan iske qosylsa, onyń 16-sy - iri jáne orta kásiporyn. Nátıjesinde, óńdeýshi sektorda osy kezeń ishinde óndirilgen ónim kólemi 65 paıyzǵa artsa, shıkizattyq emes sektordyń eksport kólemi tek sońǵy jyldyń ózinde 60 paıyzǵa ósti»,- dedi oblys ákimi. Sondaı-aq, aımaq basshysy óńirdegi kásipkerlikti damytýdyń mańyzdylyǵyn atap ótti.
«Ekonomıkanyń álemdik týrbýlenttiliginiń sabaqtaryn eskere otyryp, biz bolashaqtyń shaǵyn jáne orta bızneste ekenine árdaıym kóz jetkizýdemiz.Onyń ústine, bizdiń aldymyzda 90 myńǵa derlik ózin ónimsiz jumyspen qamtyǵandardy rásimdeý mindeti tur. Osyǵan baılanysty biz 2018 jyldy «Jappaı kásipkerlikti damytý jyly» etip jarııalaý týraly sheshim qabyldadyq »,- dedi Qyrymbek Kósherbaev.
Oblys ákiminiń orynbasalary men memlekettik organdardyń basshylary óńir ekonomıkasynyń negizgi jetistikteri men problemalary týraly aıtyp berdi.
О́z kezeginde, akademık Aganbegıan aımaqtyń áleýmettik-ekonomıkalyq damý qarqynyn joǵary baǵalady.
«Sońǵy 5 jyl ishinde óte aýqymdy jumys júrgizildi. Biz birneshe strategııa jasaqtaýǵa qatystyq. Olardyń eshqaısysy sizderdikindeı tabysty júzege asyrylǵan joq»,-dedi Abel Aganbegıan.
Abel Aganbegıan aımaq basshylyǵy ekonomıkany ártaraptandyrýda durys sheshim qabyldaǵanyn atap ótti.
«Eń mańyzdysy, osy oraıda óndeý ónerkásibine basymdyq berildi»,- dedi Aganbegıan.
«Qyzylorda kúnde ózgerip jatyr. Muny biz ár kelgen saıyn baıqap otyrmyz. Eń bastysy, osymen toqtap qalmaı, basty salalardy damytý boıynsha jumys istedi»,- dedi akademık.
Qyzylorda oblysyna jumys sapary barysynda Abel Aganbegıan men Sergeı Kalendjıan Qyzylorda qalasy men Shıeli aýdanyndaǵy birqatar óndiristik jáne áleýmettik nysandardy aralap, Syrdarııanyń sol jaǵalaýynda boı kóterip jatqan jańa qalanyń qurylysy men kásipkerlikti qoldaý ortalyǵynyń jumysymen tanysty.