«Prezıdenttiń bes áleýmettik bastamasy» Úndeýinen týyndaıtyn mindetterdi talqylaýǵa arnalǵan aktıv jıynynda aımaq basshysy Qumar Aqsaqalov baıandama jasap, ár baǵyt boıynsha jergilikti jerlerde atqarylatyn is-sharalardy ortaǵa saldy.
Elbasy Parlament palatalarynyń birlesken otyrysynda jarııalaǵan Úndeýinde Qazaqstandy odan ári kemeldendire túsetin aýqymdy baǵdarlamalar usynyp, bes áleýmettik jobany daralap kórsetti, deı kelip Qumar Irgebaıuly alda belsendi jumystar kútip turǵanyn atap kórsetti. Turǵyndardy qoljetimdi ári jaıly baspanamen qamtamasyz etý–kókeıkesti máselelerdiń biri. Oblysta 19 myń adam páter kezeginde tursa, 32 myń adam «Turǵyn úı qurylys jınaq banki» arqyly jeke esep-shot ashqan. Qurylys ındýstrııasyn jandandyrýdyń arqasynda byltyr 200 myń sharshy metr turǵyn úı paıdalanýǵa berildi. Ulttyq qordyń qarajaty esebinen 400 páter iske qosyldy. «Nurly jer», «Nátıjeli jumyspen qamtý jáne jappaı kásipkerlikti damytý» baǵdarlamalary arqyly 19 kóp qabatty turǵyn úı qoldanysqa beriledi. «7–20–25» baǵdarlamasy ár otbasy úshin baspana alýdyń jańa aýqymyn aıqyndap berdi. Oǵan qol jetkizý maqsatymen jeńildikti nesıe tetikteri usynylyp, turǵyn úı máselesin jyldam sheshýdiń qoljetimdiligi arta túsetin bolady.
Salyq júktemesin azaıtý– jalaqysy tómen sanattaǵylar úshin úlken jeńildikterdiń biri. Jasyratyny joq, salyqtyń shamadan tys kóptiginen kóleńkeli bıznespen aınalysatyndar, tabysyn jasyratyndar, mindetti alym tóleýden jaltaratyndar az emes. Jaldanyp jumys isteıtin aýyldyqtar tómengi eńbekaqyny qanaǵat tutýǵa májbúr. Salyq mólsheriniń kemitilýi esebinen óńir bir mıllıard teńgege jýyq shyǵyn shegetinine qaramastan jurtshylyqtyń kirisi kóbeıip, satyp alý múmkindigi artady degen úmit zor. Q. Aqsaqalov azyq-túlik qaýipsizdigin qamtamasyz etýdi, birinshi kezekte tutynatyn taǵamdar baǵasynyń qoljetimdi bolýyn tıisti oryndarǵa kúnbekún qadaǵalap otyrýdy tapsyrdy.
Jappaı kásipkerlikti damytý aıasynda ózin-ózi jumyspen qamtyǵan jáne jumyssyz júrgen jandardy qoǵamdyq paıdaly isterge tartýdyń joldary kóp. Sondaı yntalandyrý sharalarynyń biri jeńildetilgen nesıe berý tájirıbeden ótken, aqtalǵan ádis bolyp tabylady. О́tken jyly bul salaǵa 2 mıllıard teńgeniń 437 shaǵyn nesıesi baǵyttalsa, 425-i aýyldyqtardyń enshisinde. Bıyl 2,8 mıllıard teńge qarastyrylǵan. Qosymsha bir mıllıard teńge bólinip, jalpy nesıeleý kólemi 4 mıllıard teńgege deıin ulǵaıtylady. 800 adam jańa kásibin ashatyn bolady. Aldaǵy ýaqytta 5 mıllıard teńgege deıin ósirilip, 1 myń adam qamtylady.
Elbasynyń besinshi bastamasy eldi gazben qamtamasyz etý jaıyna arnaldy. Bul oraıda ortalyq jáne soltústik óńirlerdiń áli kógildir otynsyz otyrǵany eskerilip, magıstraldy gaz qubyryn salý jobasy jalǵasatyny málimdeldi. Aımaq basshysy jergilikti óndiris oryndary men úı sharýashylyqtary negizinen suıytylǵan gaz qoldanatynyn, kómir jaǵý qorshaǵan ortaǵa, ekologııaǵa úlken zııan tıgizetinin atap kórsetti. Gaz magıstralynyń jalpy uzyndyǵy 1,5 myń shaqyrymdy qurasa, 141 shaqyrymy Taıynsha, Aqqaıyń, Qyzyljar aýdandary arqyly ótetin bolady. Osylaısha ekologııalyq ahýal da jaqsarady.
Jıynda sóz alǵan M. Qozybaev atyndaǵy Soltústik Qazaqstan memlekettik ýnıversıtetiniń rektory Serik О́mirbaev budan bylaı joǵary bilimdi dárigerler de daıarlanatynyn, granttar sany artatynyn, keleshekte 500 orynǵa laıyqtalǵan eki jataqhana salynatynyn jetkizdi. Basqa da sóıleýshiler Elbasy usynǵan bes áleýmettik jobany júzege asyrýdyń áleýeti zor ekenin áńgimeledi.
О́mir Esqalı.
«Egemen Qazaqstan».
Soltústik Qazaqstan oblysy.