Búgin Ortalyq kommýnıkasııalar qyzmetinde ótken baspasóz máslıhatynda Energetıka vıse-mınıstri Suńǵat Esimhanov eldegi energetıka ınfraqurylymyn jańǵyrtý jáne jylytý maýsymyna daıyndyq barysy týraly baıandady, dep habarlaıdy Egemen.kz.
2025 jyly energetıkalyq nysandarda aýqymdy jóndeý jumystary júrgizildi. Atap aıtqanda, 10 energoblok, 63 qazandyq jáne 39 týrbına jańartyldy. Sonymen qatar 17 myń shaqyrym elektr jelisi men 420 qosalqy stansııa jóndeýden ótti. Jylý jelileriniń 323 shaqyrymy aýystyryldy.
Energetıka baǵytyndaǵy eleýli ózgerister
Nátıjesinde elektr energııasyn óndirý kólemi tarıhı eń joǵary deńgeıge jetip, 17 273 MVt boldy. Bul aldyńǵy jylytý maýsymymen salystyrǵanda 7 paıyzǵa artyq. JEO-lardyń tozý deńgeıi 64 paıyzdan 61 paıyzǵa deıin tómendedi.
2026 jyly:
9 energoblok, 55 qazandyq jáne 51 týrbına jóndeledi;
17,1 myń shaqyrym elektr jelisi men 444 qosalqy stansııa jańartylady;
377 shaqyrym jylý jelisi aýystyrylady.
Josparlanǵan jumystar tozý deńgeıin 61 paıyzdan 59 paıyzǵa deıin tómendetýge múmkindik beredi.
Qazirgi tańda energonysandar qoımalarynda 4,7 mln tonna kómir bar. Bul ótken jylmen salystyrǵanda 7 paıyzǵa kóp. Barlyq stansııalarda normatıvtik otyn qory qalyptastyrylǵan.
Fransııa Qazaqstannyń atom-energetıkalyq jobalaryna qalaı qoldaý kórsetedi?
Jalpy, bıyl kommýnaldyq-turmystyq sektor men halyqtyń kómirge degen qajettiligi 7,46 mln tonnany quraıdy. Búginde 7,68 mln tonna kómir daıyndalyp, jospar 103 paıyzǵa oryndalǵan.
Energetıka mınıstrligi kúzgi-qysqy kezeńniń turaqty ótýin qamtamasyz etý baǵytyndaǵy jumysty jalǵastyratynyn málimdedi. Jańǵyrtý sharalary eldiń energetıkalyq qaýipsizdigin kúsheıtýge baǵyttalǵan.