О́ńirde sońǵy kúnderi tolastamaı jaýǵan jańbyr qasat qardy lezde eritip, aımaqtaǵy úıler, aýlalar men qora-qopsyny sý ala bastady.
Oblystyq Tótenshe jaǵdaılar departamenti baspasóz qyzmetini taratqan málimetterine súıensek, qazirgi ýaqytta 6 jeke menshik úı men 25 aýla aýmaǵyn sý basqan. Naqtyraq aıtsaq, О́skemende 4 úı men 14 ýchaske, Aıagóz aýdanynda 2 úı men 6 ýchaske, Ulan aýdanynda 5 aýla aýmaǵy jańbyr men erigen qar sýynyń astynda qalǵan. Tótenshe jaǵdaılar departamentiniń 200 qyzmetkeri, 50 tehnıkasy men 20 sý sorý qurylǵysy О́skemen qalasy jáne Aıagóz, Ulan, Glýbokoe aýdandarynda kún-tún demeı tilsiz jaýmen kúresýde. Qutqarýshylardyń bir toby Ulan aýdanynyń Mamaı batyr aýyly turǵyndarynyń qaýipsizdigin kúzetýge jumyldyrylypty. Sebebi, qarǵyn sý aýyl shetindegi kópirdiń ústine shyǵyp ketken. Sonymen qatar Glýbokoe aýdanynyń Ýshanov aýylynda eldi mekendegi úılerge sýdy jibermeý úshin joldardy tazartý jáne qum tógý jumystary júrgizilýde. Departament qyzmetkerleri bir táýlikte 23 adamdy qaýipsiz jerge kóshiripti.
Al oblys ortalyǵy – О́skemende turǵyn úılerdiń aýlalary men jeke menshik úılerdi sý basýmen qatar qalanyń ortalyq kósheleri de kólkigen sý astynda qalyp otyr. Kóshege jaıylǵan kólkigen sýdan adamdar túgil kólikterdiń ózi ázer ótýde. Qala ákiminiń baspasóz qyzmetiniń habarlaýynsha, qarǵyn sý Krasın, Kúlenov, Shmelev log, Ahmer, Samsonov, Ablaket jáne Mırnyı eldi mekenderiniń turǵyndaryn ábigerge salýda. Samsonov aýylynan 10 adam qaýipsiz jerge kóshirilgen. «О́skemen tártip» mekemesiniń dırektory Tamara Rahymjanova qazirgi ýaqytta qolda bar tehnıkalar tek sý basqan úılerge ǵana jiberilgenin, mólsherden tys sýdy taratýǵa jerasty qudyqtarynyń shamasy jetpeı jatqanyn habarlady.
Azamat QASYM, «Egemen Qazaqstan»
Shyǵys Qazaqstan oblysy
Sýretti túsirgen Tileýbek ShAIаHMET