Qazaqstannyń Syrtqy ister mınıstri Qaırat Ábdirahmanov Astanadaǵy Eýropalyq Odaq ókildiginiń basshysy, Elshi Traıan Hrısteany Qazaqstan men Eýropalyq Odaq arasyndaǵy qarym-qatynastardy 2018 jylǵy 26 aqpanda Brıýsselde ótken Qazaqstan - Eýropalyq Odaq Yntymaqtastyq keńesiniń 16-shy otyrysynda qol jetkizilgen ýaǵdalastyqtar turǵysynda odan ári damytý perspektıvalaryn talqylady.
Taraptar 2015 jylǵy 21 jeltoqsanda Astana qalasynda qol qoıylǵan Keńeıtilgen áriptestik pen yntymaqtastyq týraly kelisimdi (KÁYK) iske asyrý úshin birlesken qadamdardy kórsetetin jol kartasyn ázirleý jumystaryn bastaý qajettigi týraly kelisti. (Qazirgi kezde KÁYK-ti EO-ǵa múshe barlyq 28 memleket ratıfıkasııalaýǵa deıin ýaqytsha qoldaný rejıminde qoldanyp keledi: bul rette, EO-ǵa múshe 23 memleket jáne Eýropalyq Parlament ony bekitti).
Sonymen qatar, Q.Ábdirahmanov jáne T.Hrıstea Eýrazııa qurlyǵyndaǵy ózara baılanys jáne kóliktik-logıstıkalyq qatynastardyń perspektıvalyq baǵyttaryn, sondaı-aq Ortalyq Azııa memleketteri arasyndaǵy yntymaqtastyqtyń aǵymdaǵy oń úrdisterin qarastyrdy. Eýropalyq Odaq О́kildiginiń Basshysy ázirlenip jatqan Eýropa men Azııa arasyndaǵy ózara baılanys jónindegi Eýropalyq Odaqtyń strategııasyn osy jyldyń qazan aıynda ótetin «Azııa-Eýropa» Forýmy Sammıtine (ASEM) deıin bekitý kútilip otyrǵanyn aıtyp ótti. Sonymen qatar, óńir elderi, onyń ishinde Qazaqstan belsendi qatysyp otyrǵan Ortalyq Azııa boıynsha EO-nyń jańa Strategııasyn ázirleý prosesi jalǵasýda. EO-nyń jańa strategııasy 2019 jyldyń ekinshi jartysynda qabyldanady dep boljanýda.
Aýǵanstandaǵy turaqty damýǵa járdemdesý máselelerinde yntymaqtastyqqa erekshe nazar aýdaryldy. EO Elshisiniń aıtýynsha, qazaqstandyq taraptyń tıisti bastamasyna jaýap retinde Eýropalyq Komıssııa 2010 jyldan beri júzege asyrylyp kele jatqan Qazaqstannyń Aýǵanstan úshin bilim berý baǵdarlamasyn damytý sheńberinde Qazaqstannyń joǵary oqý oryndarynda aýǵan áıelderin oqytý jobasyn qarjylandyrýdyń birinshi kezeńin daıyndaýǵa kiristi.
Kezdesý barysynda eýropalyq dıplomat qoǵamdyq ómirdiń túrli salalaryndaǵy quqyq ústemdigi men zańnamany jetildirýge baǵyttalǵan Qazaqstannyń ınstıtýsıonaldy reformalaryn iske asyrý barysy týraly habardar boldy.
Q. Ábdirahmanov ekonomıkalyq damý úshin jańa yntalandyrý sharalaryn, orta tapty nyǵaıtý jáne eldiń adamı áleýetin odan ári damytýǵa baǵyttalǵan Prezıdent Nursultan Nazarbaevtyń bes áleýmettik bastamasymen egjeı-tegjeıli tanystyrdy.
Osy oraıda, taraptar atalǵan bastamalardy iske asyrýda Qazaqstan men Eýropalyq Odaqtyń ózara yqpaldasý joldaryn talqylaı otyryp, osylar QR men EO yntymaqtastyǵynyń negizgi baǵyttaryna, oǵan múshe memleketterdiń jáne qarjy ınstıtýttarynyń, atap aıtqanda Eýropalyq qaıta qurý jáne damý bankiniń negizgi baǵyttaryna tolyq sáıkes keletindigine nazar aýdardy.